د چین په چینګداو بندر کې د ډسمبر تر ۸مې نېټې پورې د توکو د لېږد رالېږد کلنۍ اندازه له ۷۰۰ ملیونو ټنو زیاته ښودل شوې ده.
چینګداو بندر په روان کال کې له ځیرکې ټکنالوژۍ ښه استفاده کړې او د کانټینرونو د اوټوماتیک بارېدو او ښکته کېدو د موثریت په برخه کې يې په ۱۳م ځل نړیوال ریکارډ ټينګ کړی دی.
د چین حکومت د ډسمبر په ۸مې نېټې يو لړ اقتصادي شمېرې خپرې کړي، چې له مخې یې د روان کال په تېرو یوولسو میاشتو کې د دغه هېواد د توکو د وارداتو او صادراتو عمومي ارزښت ۴۱ اعشاریه ۲۱ ټریلیونو یوانو ته رسېدلی او دغه رقم د تېر کال د همدې مودې په نسبت ۳ اعشاریه ۶ سلنه زیاتوالی ښيي. په دې جمله کې په تېر نومبر کې يې د مالونو صادراتي او وارداتي ارزښت د تېر کال د همدې میاشتې په پرتله ۴ اعشاریه یو سلنه زیات شوی، چې دا له تېرو لسو میاشتو راهیسې زياتوالی ښيي.
چین له پیچلي نړیوال وضعیت سره سره اغېزمنې عمومي تګلارې غوره کړي او اقتصادي چارې يې ثابتې ساتلې دي.
نړیوالو رسنیو ویلي، د چین اقتصاد د یوې لویې بېړۍ په څېر په سختو سمندري څپو کې مخ پر وړاندې روان دی.
د چین د نړیوال تجارت ښه پایله د دې ښکارندويي کوي، چې د دغه هېواد اقتصاد انعطاف پذيره او د ثابت پرمختګ په حال کې دی.
د نړیوال اقتصاد د پرمختګ په پیچلو حالاتو کې د چین ثابت اقتصاد د نړیوالو پاملرنه را جلب کړې ده.
د روان کال په تېرو ۱۱ میاشتو کې له اسیان، اروپايي ټولنې، افریقا او لاتیني امریکا سره د چین د توکو واردات او صادرات زیات شوي او په ورته مهال کې يې د شخصي تصدیو او د بهرنیو پانګوالو تصدیو د وارداتو او صادراتو ارزښت هم زیات شوی دی او دا د دې څرګندويي کوي، چې د چیني تصدیو خوځنده ځواک مخ په لوړېدو دی.
د روان کال په تېرو درېیو ربعو کې د چین ناخالص کورنی توليد د تېر کال د همدې مودې په نسبت ۵ اعشاریه ۲ سلنه زیات شوی او مخکښ نړيوال ځای يې خپل کړی دی. په چين کې د روزګار او د توکو د بیو ګرافونه عموماً ثابت ساتل شوي او نړیوال لګښت او عواید یې نسبتاً برابر دي او دا د دې ښکارندويي کوي، چې د دغه هېواد اقتصاد د ثابت خوځښت تمایل نه دی بدل شوی او د اقتصاد او ټولنې د پرمختګ عمده کلنۍ موخې به یې پوره شي.
یاد ګرافونه هم د چین د اقتصاد عمومي وضعیت په ډاګه کوي.
غرضې ته په کتو، د تخنیکي نوښت او چارو ابتکار په يو ځای کېدو سره، په چین کې د مصنوعي ځیرکتیا، ډیجټلي اقتصاد او زرغون اقتصاد په څېر د نوي کیفیت تولیدي ځواک ثابت او چټک پرمختګ موندلی دی.
چین د نړۍ لومړی هېواد دی چې د کورنيو امتیازي حقونو شمېر یې له ۵ میلیونو پورته شوی او نړیوالو شرکتونو ته يې ډېرې ګټې رسولې دي.
د زیس（ZEISS） شرکت د چیني زون اجرائیوي مشر مارتين فيسچېر سي جي ټي اېن ته ویلي، چې شرکت به یې سږ کال په شانګهای ښار کې د چیني زون د عمومي صنعتي پارک پروژه پيل کړي او دا به د دې شرکت تر ټولو لویه پانګونه وي او په دې پارک کې د څېړنې او اکتشاف نتیجې به يې په ګردې نړۍ کې وکارول شي.
د چین اقتصاد انعطاف پذيره دی او د نړیوالې ټولنې ډېره پاملرنه يې راجلب کړې ده. څو نړیوالو سازمانونو په دې وروستیو کې د چین د اقتصادي پرمختګ وړاندوینه لوړه کړې ده. د بېلګې په توګه، د اقتصادي همکاريو سازمان د چین د اقتصادي پرمختګ وړاندوینه ۵ سلنې ته لوړه کړې او دا په روان کال کې د دغه سازمان درېیم ځل دی، چې د چين د اقتصادي پرمختګ وړاندوینه لوړوي او د دغه هېواد اقتصاد يې ډېر انعطاف پذیره او حیاتي ځواک لرونکی بللی دی.
اوس ډسمبر دی او کال به ډېر ژر پای ته ورسېږي او نوی کال به پيل شي. سږکال به د چین د څوارلسم پنځه کلن پلان هم پای ومومي او د پنځلسم پنځه کلن پلان تطبیق به يې ډېر ژر شروع شي.
د چین کمونېست ګوند د مرکزي کمېټې سیاسي بیورو د ډسمبر په ۸مې نېټې یوه غونډه ترسره کړې، چې پکې یوه کلیدي موضوع د ۲۰۲۶م کال د اقتصادي چارو تعدیل وو.
نړۍ د چین له اقتصادي پرمختګ سره ګټورو فرصتونو ته په تمه او سترګې په لار ده، چې له دغه هېواد سره د همکاريو له لارې ګډې ګټې ترلاسه کړي.
