د ۲۰۲۵م کال د څونګ دو نړيوال فورم څه موده وړاندې د چين د ګوانګ دونګ ولايت په ګوانګ جو ښار کې پای ته ورسېد، چې د ۲۳ هېوادونو ۲۸ پخوانيو سياسي چارواکو او د ځينو نړيوالو سازمانونو پخوانيو مشرانو او د چين او نورو هېوادونو د سياسي او سوداګريزو چارو استازو پکې برخه اخيستې وه او د نړيوالو ننګونو پر وړاندې د چارو په هکله يې مشورې کړې دي.
د فورم ګډونوالو نړۍ له ګڼو خطرونو او بدلونونو سره مخ بللې او پر نړيوالې ټولنې يې غږ کړی، چې بېلا بېل هېوادونه د مقابلې پر ځای داسې خبرو ته وهڅوي، چې د ننګونو پر وړاندې خپلمنځي همکارۍ ټينګې کړي او د متقابلو ګټو له لارې ګډ پرمختګ ومومي.
څو اړخيزم د ګډ پرمختګ مخکښ شرط دی
اوسمهال په نړۍ کې يو اړخيزم او د ځاني سوداګرۍ ساتونکې غوښتنې ډېرې شوي او هم جيوپوليټيکي شخړې پکې په سختېدو او پراخېدو دي.
کارپوهان وايي، د نړۍ د صنعتي او اکمالاتي ځنځيرونو پر وړاندې سخت خنډونه جوړ شوي، نړيوال اقتصاد او تجارت له سختو فشارونو سره مخ شوي او نړيوال پرمختګ په يوې څلور لارې کې بند پاتې دی.
د ګڼو هېوادونو پخوانيو سياسي چارواکو او د نړيوالو سازمانونو پخوانيو مشرانو په خپلو ويناوو کې پر څو اړخيزم ټينګار کړی او پر نړيوالې ټولنې يې غږ کړی، چې د ازادې سوداګرۍ لپاره هڅې او د خطرونو او ننګونو پر وړاندې ټينګه مقابله وکړي.
د ايټاليا پخواني صدراعظم او د اروپايي ټولنې د کمېټې مخيکني رئيس رومانو پرودي ياد فورم ته په وينا کې اوسنۍ نړۍ تړلې او بنده ياده کړې او ويلي يې دي، چې اکثره هېوادونه یوازې د خپلو ګټو لپاره کار کوي، چې دا به پر نړيوال اقتصاد، ګډو ګټو او پرمختګ منفي اغېزې وکړي.
نوموړي ويلي، ځيني هېوادونه د خپلو سياسي غوښتنو لپاره د ازاد تجارت او د نړيوال پرمختګ پر وړاندې خنډونه جوړوي، چې دا يې د نه منلو وړ چارې بللې دي.
د ملګرو ملتونو پخواني سرمنشي بان کي مون رسنيو ته ويلي، چې د روان کال له پيل راهيسې د متحده ايالاتو د تعرفو زياتوالي او تجارتي شخړو پر نړيوال اقتصاد پراخې منفي اغېزې کړي، نړيوال انفلاسيون يې سخت کړی او همکارۍ يې بې ثباته کړې دي.
نوموړي ويلي، نړيواله ټولنه باید ټولشموله او عادلانه تجارتي اصول بيا جوړ کړي او که داسې ونه کړي، نو پرمختيايي هېودونه به د وړتياوو د کموالي او د پانګونو د انتقال په برخه کې له ننګونو سره مخ شي.
د چين وړانديزونه د نړيوالو ګډو نظريو د راټولولو لپاره ګټور دي
په وروستيو کلونو کې په نړۍ کې د سولې، پرمختګ، امنيت او مديريت کسرونه زيات شوي دي. چين نړيوالې ټولنې ته د پرمختګ، امنيت، تمدن او مديريت وړانديزونه کړي او په مختلفو ليد لورو يې متزلزلې نړۍ ته ثبات برابر کړی دی.
په نړۍ کې اوس د بدلونونو او انسانانو پر وړاندې د ګڼو ستونزو د حل لپاره د چين له يادو وړانديزو کار اخيستل کېږي.
په ياد فورم کې د ګڼو هېوادونو پخوانيو مشرانو د چين د يادو څلورو وړانديزونو فعاله ارزونه کړې او د ګډو نظريو د راټولولو او د نړيوال مديريت د لا عادلانه او معقوليت لپاره يې ګټور بللي دي.
د نړۍ د مشرانو ټولنې رئيس او د سلوانيا پخواني ولسمشر دانيلو تورک رسنيو ته ويلي، چې د چين يادو څلورو وړانديزونو لوری روښانه کړی او نړۍ ته يې پيغام ورکړی، چې دوی څنګه د ننګونو پر وړاندې مبارزه کولی او یوه خوندي، متنوع او درناوي وړ نړۍ جوړولی شي؟ څنګه په نويو حالاتو کې نړيوال مديريت عملي کولی شي؟ نوموړي ويلي، چين په دغو چارو کې ستر رول لوبولی شي.
د چين پرمختګ نړۍ ته نوي فرصتونه برابروي
د بېلا بېلو هېوادونو مېلمنو د فورم پرمهال د چين د عصري کېدو پر بهير هم بحثونه کړي او ګڼ شمېر يې پر دې اند وو، چې د چين د عصري کېدو بهير پرمختيايي هېوادونو ته ارزښتناکې تجربې برابرې کړي او د نړيوال اقتصاد د پرمختګ لپاره يې ثابت رول لوبولی دی.
د نايجريا پخواني ولسمشر ولوسيګوم وباسانجو ویلي، چې هغه په ۱۹۸۶م کال په لومړي ځل چين ته سفر کړی و او له همغه وخت راهیسې د چين پرمختګ څاري او زیاته کړې يې ده، په تېرو لسګونو کلونو کې په چين کې نادره اقتصادي پرمختګ شوی، اته سوه میليونه خلک یې له بېوزلۍ څخه وتلي او د بېوزلۍ د له منځه وړلو په چارو کې يې يوه نمونه جوړه کړې ده.
د کاناډا پخوانۍ صدراعظمې کيم کامپبيل ويلي، چين په تېرو لسګونو کلونو کې د ليدو وړ برياليتوبونه ترلاسه کړي او د نوښت او توليد په چارو کې يې پياوړی ځواک ښودلی دی.
چين په نړيوال ډګر کې مهم رول لري او نړۍ ته يې د پرمختګ نوې انجن برابر کړی دی.
د بيلجيم پخواني صدراعظم يويس ليتيرمي د مصنوعي ځيرکتيا فرعي فورم ته په وينا کې ويلي، چې د چين د نوښت د پرمختګ چارو ورته ډېرې خاطرې وربښلې دي.
نوموړي ويلي، اروپايي ټولنه او چين د متقابلو ګټو پر بنسټ همکارۍ کوي او يو بل ته ګټې رسوي او په خبره یې، اروپايي هېوادونه او چين په نورو ګڼ شمېر برخو کې هم متقابلې مرستې کولی شي.
اروپايي ټولنه او چين باید د ګډ پرمختګ لپاره هڅې وکړي.
