د سعودي عربستان وليعهد او لومړي وزير محمد بن سلمان بن عبد العزيز آل سعود د ډسمبر په ۱۴مه نېټه په پلازمېنه رياض کې د چين د کمونېست ګوند د مرکزي کمېټې د سياسي بيورو له غړي او بهرنيو چارو وزير وانګ يي سره لیدلي دي.
محمد بن سلمان له وانګ یي سره په لیدنې کې ویلي، چې سعودي عربستان د يو چين پېژندنې پر اصل ټینګار لري، د چين د ملي حاکميت او ځمکنۍ بشپړتيا د ساتنې ملاتړ کوي او په کورنيو چارو کې يې د بهرنيو ځواکونو له هر ډول لاسوهنې سره ټينګ مخالفت کوي.
نوموړي ويلي، سعودي عربستان به له چين سره د تېلو او ګازو، نوې انرژۍ، مصنوعي ځيرکتيا او لوړو ټکنالوژيو په برخو کې ژورې همکارۍ وکړي.
محمد بن سلمان د سعودي عربستان او ايران ترمنځ د اړيکو د عادي کېدو په برخه کې د چين د هڅو ستاینه او مننه ترې کړې ده.
وانګ يي ویلي، چين به د سعودي عربستان د ډېر باور او تکيې وړ ملګري په توګه، د دغه هېواد د سمسورتيا په بهير کې هر اړخيزو او متقابلو ګټورو همکاریو ته وده ورکړي، د دوديزې انرژۍ او د نويو او راتلونکو صنعتونو په برخو کې به ورسره همکارۍ پیاوړې کړي او د خپلمنځي هراړخيزو ستراتيژيکو همکاریزو اړیکو لپاره به نوی افق پرانیزي.
وانګ يي زياته کړې، چين چمتو دی چې د خليج همکارۍ کمېسيون (GCC) له غړیو هېوادونو سره د چين – GCC ترمنځ د ازادې سوداګرۍ تړون لاسليک کړي. چين غواړي له سعودي عربستان سره نږدې اړيکو او مشورو ته دوام ورکړي او د منځني ختيځ د سولې او امنيت د ټينګښت لپاره به ښه رول ولوبوي.
