د ولسمشر غني د ملي امنیت سلاکار حمدالله محب د ملي یووالي د حکومت د تګلارې خلاف ژبه کارولې ده. نوموړي پر زلمي خلیلزاد تورونه لګولي او ویلي یې دي چې دوی ته معلومات نه ورکوي، طالبانو ته کمپاین کوي او غواړي خپله د افغانستان وایسرای شي. نوموړي دغه راز د امریکا له تګلارې ناخوښي څرګنده کړې ده او ګیله یې کړې چې د امریکا د ملي امنیت سلاکار ورسره کتلي نه دي.
د حمدالله محب خبرې ښې وې، د افغان حکومت دریځ باید همداسې وي، خو ایا دوی په دغه دریځ کې رښتیني دي؟ ایا رښتیا د افغانستان د ګټو لپاره دا دریځ خپلوي؟ او دا ډول دریځ په اوسنیو حالاتو کې د افغانستان له ګټو سره مرسته کولی شي؟
د ملي یووالي حکومت د امریکا د احسان پوروړی دی، امریکا جوړ کړ او د افغانستان د ارزښتونو، تاریخ او اساسي قانون خلاف جوړ شوی دا حکومت یې پنځه کاله وساته. د ملي یووالي حکومت هم د افغانستان د ګټو او ارزښتونو خلاف امریکا ته ډېر څه ورکړل او اړیکه یې تر ډېره د آمر او مامور وه. ولسمشر غني د خپل کار په لومړیو کې ورسره شرموونکی امنیتي تړون لاسلیک کړ، د امریکا هره غوښتنه یې ومنله، د امریکا پر جنایتونو یې سترګې پټې کړې، د هغوی بمبارۍ او هر جنایت یې تحمل کړ او آن د هغوی جنایتونه او جرمونه یې هم خپل وګڼل. امریکا بمبارۍ وکړې، دوی توجیه کړې، امریکا خلک ووژل، دوی وویل چې امریکا نه، موږ وژلي، امریکا اردو او پولیس بمبار کړل، دوی پرې پټه خوله پاتې شول. دا یوه پېښه نه ده، بلکې سلګونه پېښې دي چې د ملي یووالي حکومت پکې د افغانستان ارزښتونه، خپلواکي، حیثیت، ګټې او ملي حاکمیت تر پښو لاندې کړ، څو امریکا خوشاله وساتي. امریکا له طالبانو سره اړیکې جوړې کړې، خبرې پیل شوې، ولسمشر غني وویل چې دا زموږ طرحه ده او هر څه په تدبیر او دقت سره مخکې ځي. امریکا له طالبانو سره په خبرو کې دولت ته هېڅ معلومات نه ورکول، خو ولسمشر غني به ویل چې زه پوره معلومات لرم او خلیلزاد ګزارش را کوي. امریکا به له طالبانو سره مخامخ او پټې خبرې کولې، ارګ به ویل چې آخر به موږ پکې ور ګډیږو.
په تېرو څلورو کلونو کې د ارګ او امریکا اړیکه د مامور او آمر اړیکه وه. امریکا به هر څه ویل او ارګ به په پټو سترګو منل. اوس هم دا اړیکه همغه ډول ده. اوس هم پر امریکا له دې امله نیوکې نه کېږي چې د افغانستان ګټې خوندي شي، بلکې نیوکې له دې امله دي چې په راتلونکي بدلون کې اوسنی ولسمشر او ملګري یې نشته. له همدې امله ضد او نقیض دریځونه لري چې دا په هېڅ ډول د افغانستان په ګټه نه دي.
که ولسمشر او ملګري یې رښتیا پر امریکا شک لري او غواړي د افغانستان ګټې خوندي کړي، لومړی دې پر امنیتي تړون له سره غور وکړي. بیا دې په کلو او بانډو کې روان وحشت بند کړي چې امریکايي ځواکونه یې زموږ د ځواکونو سره په ګډه کوي. حکومت دې خپلواک او د افغانستان د ګټو پر اساس عمل وکړي. له دې پرته دا یوازې د واک د تداوم ناکامه هڅه ده چې د واک په وروستیو کې کېږي او هېڅ ګټه نه لري.
