ډېری خلک دې ته متوجه دي، چې د چین اقتصاد د نړۍ لومړی یا دوهم ځای نيولی، خو په حقیقت کې د دغه هېواد اقتصادي پالیسي جوړونکي بیا دغه ټکي ته ډېر پام نه کوي، بلکې دوی خپل ټول تمرکز د هېواد د اقتصادي چارو پر پرمخبېولو او د اقتصاد پر ثابتې او دوامدارې ودې ورټول کړی دی.
چين د نړۍ د څه باندې ۱۳۰ هېوادونو مهم سوداګريز همکار دی او په اقتصاد پسې يې نړيوال اقتصاد تړلی دی، نو ځکه د چين د واکمن کمونېست ګوند د مرکزي کمېټې د اقتصادي چارو کلنۍ غونډې، چې تازه په بېجينګ کې پای ته رسېدلی، په طبیعي ډول د نړۍ پام ځانته را اړولی دی.
د چين د واکمن کمونېست ګوند د مرکزي کمېټې د اقتصادي چارو سږنۍ غونډه د ډسمبر له لسمې نېټې څخه تر يوولسمې نېټې پورې په پلازمېنې بېجينګ کې ترسره شوه. په دغه غونډه کې د چين د ۲۰۲۵م کال اقتصادي چارو ته لنډه کتنه شوې، اوسنی اقتصادي وضعيت پکې تحلیل شوی او د ۲۰۲۶م کال لپاره د اقتصادي کارونو پلان جوړ شوی دی.
دغې غونډې د چين د راتلونکي ۲۰۲۶م کال د پرمختګ لپاره روښانه لار ټاکلې او نړۍ ته يې هم یو مهم پيغام ورکړی، چې د نړیوالې اقتصادي ودې پر زياتوالي به اغېزې ولري.
په دغه غونډه کې د اقتصادي ثبات ترڅنګ د پرمختګونو د موندلو په اړه عمومي اقتصادي کاري اصل هم ټاکل شوی، چې دا به متزلزل نړيوال اقتصاد ته ارزښتناک ثبات او حياتي ځواک ورکړي.
د غونډې تر ټولو هستوي پيغام دا ښودل شوی، چې چين به د ماکرو يا لویو اقتصادي ملاتړو پاليسيو او د اقتصاد د ثبات لپاره روانو هڅو ته دوام ورکړي.
چين د پيچلي بهرني چاپېريال پر وړاندې څرګنده پرېکړه کړې، لافعالو مالي پاليسيو او د پيسو معتدله نرمو پاليسيو ته به دوام ورکړي او د موجودو او نويو پاليسيو په همغږۍ به د دوران ضد او دوراني تعدیلات زیات کړي. دا پدې مانا ده چې چين به خپل اقتصادي زیاتوالی په معقولو حدودو کې وساتي، چې همدا چاره به يې د نړيوال اقتصاد په ثبات کې مرسته وکړي.
چين په تېرو پنځو کلونو کې له ډېرو ننګونو سره سره بيا هم خپل هارډ يا سخت ځواک او نرم ځواک پیاوړي کړي او د خپل اقتصادي او ټولنيز پرمختګ ۱۴م پنځه کلن پلان يې په برياليتوب بشپړ کړی دی، چې د پاليسيو پايښت او اغېزې يې ترې ثابتې شوې دي.
۲۰۲۶م کال د چين د ۱۵م پنځه کلن پلان پېلامه ده او دغه هېواد د همدې کال لپاره موخه ټاکلې، چې له کیفي لحاظه به واقعي لوړوالی او له کمي لحاظه به معقول زياتوالی ولري. که د چين دغه موخه پوره شي، نو متاعو يا تجارتي توکو ته به د نړۍ د تقاضا په زياتولو، د منځمهاله توکو (Intermediate goods) يا پرزو د سوداګرۍ او خدماتو د همکاريو په پراخولو کې مرسته وکړي او پر چيني بازار د تکيه لرونکو هېوادونو باور به نور هم ټينګ کړي.
د چين د نوي کيفيت د توليدي ځواک روزل هم د نړيوالو صنعتي همکاريو د ساختار په تنظمولو کې مرسته کوي.
په یاده غونډه کې د مختلفو ځايونو له شرايطو سره سم د نوي کيفيت د توليدي ځواک د روزلو مهمه دنده ټاکل شوې ده.
د چين دغه ستراتېژي د سرتړلي کورني دوران د جوړولو لپاره نه، بلکې د پرانيستي او نوښتګر چاپېريال د برابرولو لپاره ده او بهرنيو تصديو ته په درېيو برخو کې فرصتونه برابروي:
۱. بهرنۍ تصدۍ د نويو صنایعو اکمالاتي خنځير کې ونډه اخيستلی شي.
۲. بهرنۍ تصدۍ کولی شي د چين د پراخ بازار په کار اخيستنې د سوداګريزو ګټو لپاره د تخنيکونو د استفادې لګښت کم کړي.
۳. بهرنۍ تصدۍ کولی شي په ګډې همکارۍ د پرمختيايي هېوادونو د زېربنا او زرغون بدلون بازار ته لار ومومي.
برسيره پردې، چين اوس د خپل متحد لوی بازار د جوړولو په هڅه کې دی او دغه هڅه به يې چيني بازار ته د بهرنيو تصديو د ننوتلو شرايط کم او سوداګريز چاپېريال ښه کړي او دغه راز د نوی کيفيت د توليدي ځواک په روزلو کې به بهرنیو پانګوالو ته د برخه اخيستنې اسانتياوې برابرې کړي.
په دې غونډه کې پر دې ټينګار شوی، چې چين باید خپله کورنۍ تقاضا اصلي تکيه وبولي او پرمټ يې باید پیاوړی کورنی بازار جوړ کړي. چين شاوخوا يو ميليارډ او ۴۰۰ ميليونه نفوس او خورا لوی بازار لري او د منځني عايد لرونکو ډله یې په پرله پسې توګه پراخېږي، پخوا به يې د مصرف غوښتنې د اساسي اړتياوو پوره کول وو، خو اوس يې غوښتنې د ژوند د کيفيت په لوړولو اړولې دي، نو ځکه د لوړ پای يا ډېرو عصري طبي وسايلو، د کور د ځیرکو برقي وسايلو او د زرغونو مصرفي توکو په ګډون د بهرنيو تصديو باکيفيته محصولات او خدمات په اسانۍ چيني بازار ته ننوتلی شي.
په يادې غونډه کې پر ورخلاصون او ګټې- ګټې همکارۍ هم ټينګار شوی، چې له مخې به يې چين د بهرنيو پانګو د ننوتلو لپاره منفي لېست لنډ او له پولې هاخوا سوداګريز پړاوونه به اسانه کړي او د پوهنې ملکیت حق ساتنه به تقويه کړي.
د ۲۰۲۶م کال لپاره د چین اقتصادي پاليسۍ روښانه منطق ښودلی: چين به د ثابتې ودې له لارې خپل بنسټ ټينګ کړي، د نوښت له لارې به خنډونه مات کړي او د پرانيستي همکارۍ له لارې به له نورو سره فرصتونه شريک کړي.
چين د نړيوال اقتصاد لپاره مهم انجن دی او ثابت پرمختګ يې نه يوازې د خپلځان لپاره، بلکې د نړيوال اقتصاد لپاره هم مسئول دی.
د چين لویه دروازه به نوره هم خلاصه شي او ګډې همکارۍ به د نړيوال اقتصاد د بيا غوړېدو لپاره ګټې – ګټې اپشن وګرځي.
