بدخشان؛ فیض‌اباد کې د ۱۷ سترو ټولګټو پروژو چارې پیل شوې

د بدخشان ځایي چارواکي وایي، چې د دغه ولایت په مرکز فیض‌اباد ښار کې د ۱۷ سترو ټولګټو پروژو د تطبیق چارې د یوې ځانګړې غونډې په ترڅ کې پیل شوې دي. سرچینې ویلي، دغه پروژې چې شاوخوا ۲۲۳ میلیونه ۶۰۰ زره افغانۍ لګښت پرې راځي، د بدخشان والي د هڅو او د ولایت د کانونو ریاست په همکارۍ، د کانونو د پروسس کوونکو شرکتونو او سوداګرو له لوري تمویلېږي. د پرانیستې په مراسمو کې د بدخشان ځایي چارواکو ویلي، چې افغانستان له اوږدو جګړو او کړکېچونو وروسته اوس د امنیت له نعمت څخه برخمن شوی او دا یو مناسب فرصت دی، چې د خلکو د ژوند د ښه والي لپاره عملي ګامونه پورته شي.