ډېرو هېوادونو په وروستيو کې له چين سره راشه درشه زیاته کړې او د نړۍ د رسنيو پاملرنه یې راجلب کړې ده.
د کاناډا صدراعظم مارک کارني لس ورځې مخکې چين ته په رسمي سفر تللی و او له دغه هېواد سره یې يو شمېر همکاريز تړونونه لاسليک کړي دي.
نړيوالو د سويس په داوس کې د نړيوال اقتصادي فورم په کلنۍ غونډه کې د چين د فرصتونو په اړه توده بحثونه کړي او له دغه هېواد سره یې ډيالوګ تر پخوا ډېر مهم بللی دی.
د فنلنډ صدراعظم پيټېري اورپو د جنورۍ په ۲۵مې نېټې د يو شمېر تصديو د لوړ پوړو مديرانو په مشرۍ چين ته سفر کړی او له دغه هېواد سره یې د دوه اړخيزو سوداګريزو اړيکو د لا ژورولو ژمنتيا څرګنده کړې ده.
ولې د نړيوالو پاملرنه چين ته اوښتې؟
د امريکا او چين د همکارۍ صندوق اجرايي رئيس جون ميلېر وايټ د جنورۍ په ۲۳مې نېټې له سي اېم جي سره په مرکه کې ويلي، چې چين په عمل کې نړۍ ته ښودلې، چې يو هېواد له سړې جګړې او زيرو سم لوبې څخه لرې پرمختګ کولی شي او د نړیوال پرمختګ لپاره خپله ځيرکتيا وړاندې کولی او پلان جوړولی شي.
چين په داوس فورم کې څلور فقرييز وړانديزونه کړي او ويلي يې دي، چې نړيواله ټولنه دې پر ازادې سوداګرۍ تمرکز ولري، پر څواړخيزتوب دې ټينګار وکړي، پر همکاريو او ګډو ګټو دې ټينګار ولري او پر متقابل درناوي او مساوي سلامشورو دې تمرکز وکړي.
د چين دغه څلور وړانديزونه د بې ارامې نړۍ لپاره ثبات برابروي او نړيوالې ټولنې هم دا درک کړې، چې چين د اعتماد وړ همکار دی او هر وخت يې دروازه پرانيستې پرېښودلې ده.
چين په دې وروستيو کلونو کې د اقتصاد نړیوال کېدو ته وده ورکړې ده. چين په داوس فورم کې له نړيوالې ټولنې غوښتي، چې د نړيوال اقتصاد لپاره باکيفيته پرمختګ پياوړی او د لوړې سويې ورخلاصون پراخ کړي او د اقتصاد ټولشموله نړیوال کېدو ته دې وده ورکړي.
د چين ثابت اقتصاد نړیوال اقتصاد ته باور او محرکه ځواک برابروي. په ۲۰۲۵م کال کې د چين جي ډي پي د لومړي ځل لپاره له ۱۴۰ ټريليونو يوانو واوښته، چې دا د ۲۰۲۴م کال په پرتله ۵ سلنه زياتوالی ښيي او د نړيوال اقتصاد د زياتوالي تر ټولو خوځنده ځواک ګرځېدلی دی.
چين له څه باندې ۲۴۰ هېوادونو او سيمو سره سوداګريز تګ راتګ لري او له څه باندې ۱۹۰ هېوادونو او سیمو سره يې د وارداتو او صادراتو اندازې زياتوالی موندلی دی.
په تېرو پنځو کلونو کې د چين د وارداتي توکو او خدمتونو عمومي اندازه له ۱۵ ټريليونو يوانو څخه اوښتې، په بهرنيو هېوادونو کې د پانګونو په بهير کې يې اړوندو کوربه هېوادونو ته ۳۰۰ میليارډه ډالره ماليات ورکړي او ګڼ شمېر کاري فرصتونه يې برابر کړي دي.
د نړيوال اقتصاد فورم عمومي مدير بورګ برېند پر دې نظر دی، چې چين به په راتلونکو څو کلونو کې تولیدي توان ډېر لوړ کړي او د اقتصادي زياتوالي فرصتونه به برابر کړي.
د فرانسې ولسمشر ايمانويل مکرون په داوس فورم کې د چين هرکلی کړی دی.
د کاناډا صدراعظم مارک کارني له چين څخه د ليدنې په پرمهال ويلي، چې د کاناډا او چين د اړیکو ژورتيا به د دواړو هېوادونو خلکو ته زياتې ګټې ورسوي.
په ستونزمنو حالاتو کې ډيالوګ او همکارۍ لاره روښانه کوي. نړيوال پولي صندوق د ۲۰۲۶م کال لپاره د چين د اقتصادي زیاتوالي اټکلي انډول لوړ کړی دی. چين به په روان کال کې نړیوال اقتصاد ته نور زیات خوځنده ځواک برابر کړي او د ټولو د اعتماد وړ همکار به وګرځي او خپلې دروازې به نورې هم پرانېزي.
