اسلام اباد کې پر جومات برید؛ پاکستان په خپل بل کړي اور کې سوځي

د پاکستان په پلازمېنه اسلام اباد کې د تېرې جمعې ورځې (۱۸ شعبان / ۱۷ دلوې) خونړي برید، چې د اهل تشیع پر یوه جومات ترسره شو، نږدې ۲۰۰ کسانو ته مرګ ژوبله واړوله. داعش ډلې د برید مسؤلیت منلی او د بریدګر انځور یې خپور کړی، خو اصلي طراحان، ملاتړي او د امنیتي تشو په اړه لا هم ګڼې پوښتنې راپورته شوي دي، چې ښيي پاکستان د خپلو امنیتي کړیو په ناکامۍ کې له جدي ستونزو سره مخ دی. سرچینې وايي چې د برید اصلي پلان جوړونکي عمران (ابو بکر باجوړي)، ادریس (یوسف) او ملا عمران وو، ټول د خيبر پښتونخوا، باجوړ د ډمه ډولې او کټکوټ سیمو اوسېدونکي دي. یادو کسانو بریدګر روزلی، ټلیفوني لارښوونې یې ورسره کړې او انفجاري واسکټ یې له پېښور څخه انتقال کړی و. د پاکستان امنیتي ځواکونو د برید په ورځ په نوښار حکيم اباد سیمه کې عملیات وکړل، چې یوسف (ادریس) پکې وژل شوی، ابو بکر باجوړي نیول شوی او ملا عمران تېښتېدلی دی. خو دا پېښه څرګندوي چې د پاکستان استخباراتي او امنیتي کړۍ د داعش او ورته ډلو د داخلي شبکو د کشف او مخنیوي په برخه کې ناکامه پاتې شوې. پاکستاني چارواکو هڅه وکړه چې برید د افغانستان سره وتړي، خو حقیقت دا دی چې ټول طراحان پاکستانیان وو. داعش په پاکستان کې هدفمند بریدونه ترسره کوي، په ځانګړي ډول پر جوماتونو، مدرسو، عامو خلکو او مخورو علماوو، چې ښيي داخلي امنیتي کمزوري او د استخباراتي مدیریت نیمګړتیاوې څومره خطرناکې دي. د سیاسي شنونکو په باور دا پېښه پاکستان ته روښانه درس دی چې د داعش او ورته ډلو پر ضد یوازې استخباراتي ګټه اخیستنه او بهرني تورونه نه، بلکې صادقانه، داخلي مبارزه او د پلان جوړونکو په نیولو کې جدي اقدام ترسره کړي.