چين پر نړۍوالې ټولنې غږ کړی چې پر افغانستان بنديزونه لرې کړي

د ملګرو ملتونو امنیت شورا د هغې ډلې ماموریت چې د افغانستان پر وړاندې د دې شورا د بندیزونو د څار مسوولیت لري، د یو بل کال لپاره غځولی دی. په ملګرو ملتونو کې د چین استازي فو څونګ ویلي، چې د لومړي ګام په توګه، باید د افغانستان د حکومت اړوند چارواکو ته د سفر له بندیزه دایمي معافیت هر څومره ژر چې امکان ولري، بېرته ورکړل شي، څو د هغوی نړۍوال تعاملات او اړیکې اسانه شي. چین له امنیت شورا څخه غوښتي، چې يادې مسئلې ته پاملرنه وکړي او د ۱۹۸۸م پرېکړه ليک د بندیزونو میکانیزم په اړه بياکتنه او سيسټماټيک او د پراخ لرلید لرونکی تعدیل ترسره کړي، څو دغه ميکانيزم د اوسني وضعیت اړتیاوو ته په کتو ښه تطبیق شي. فو څونګ زياته کړې، د ملګرو ملتونو د څار ډله باید یو هدفمند او بې طرفه دریځ وساتي، خپل مسلکي تخصص باید وکاروي او د ۱۹۸۸م پرېکړه ليک کمېټې د کار لپاره باید قوي ملاتړ برابر کړي.