غزني ښار کې ۱۷ پولیس وژل شوي

په غزني ښار کې د وسله والو طالبانو د بريد له امله د درېيمې حوزې د امر په ګډون ١٦ پوليس وژل شوي دي. په غزني کې يوې امنيتي سرچينې رسنیو ته ویلي، چې تېره شپه وسله والو طالبانو د درېيمې امنيتي حوزې اړوند د ده خدايداد په سيمه کې د پوليسو پر يوې پوستې بريد وکړ. هغه وايي چې په دغه بريد کې شپږ پوليس وژل شوي او پوسته هم طالبانو نيولې ده. د غزني چارواکو تر اوسه په دې اړه څه نه دي ويلي. بل لور ته طالبان هم دغه بريد تاييدوي. د دې ډلې وياند ذبيح الله مجاهد وايي چې طالبانو تېره شپه د غزني د مرکز په ده خدايداد سيمه کې يوه پوسته نيولې چې په ترڅ کې یې شپږ پوليس وژل شوي او يو بل نيول شوى دى. دى وايي چې وروسته طالبانو پر مرستندوی ځواکونو هم بريد کړى چې په ترڅ کې یې لس پوليس وژل شوي دي. مجاهد زياتوي چې په دغه بريد کې يو شمېر وسلې او مهمات هم د طالبانو لاس ته ورغلي دي.