امریکا او ایران د کړکېچ د کمولو لپاره موقتي هوکړې ته رسېدلي

د ایران او امریکا ترمنځ د تاوتریخوالي د کمولو په موخه د دوه اونیو لپاره پر اوربند هوکړه شوې ده. د ایران د بهرنیو چارو وزیر سید عباس عراقچي ویلي، که پر ایران بریدونه ودرول شي، د دې هېواد وسله‌وال ځواکونه به هم خپل دفاعي عملیات بند کړي. هغه زیاته کړې چې د دوو اونیو لپاره به د هرمز تنګي له لارې خوندي تګ راتګ د ایران د پوځ په همغږۍ ممکن وي. بلخوا د امریکا ولسمشر ډونالډ ټرمپ اعلان کړی چې د ایران پر وړاندې به پوځي بریدونه د دوو اونیو لپاره وځنډوي. نوموړي ویلي، دا پرېکړه د دې لپاره شوې چې د دواړو هېوادونو ترمنځ د سولې او اوږدمهاله هوکړې لپاره زمینه برابره شي. ټرمپ همداراز ویلي چې د ایران له لوري وړاندې شوی لس ماده‌یي وړاندیز د خبرو اترو لپاره مناسب بنسټ ګڼي، او زیاتوي چې د دواړو لورو ترمنځ پر ډېرو اختلافاتو هوکړه شوې ده. د دواړو لورو په وینا، دا دوه اونیزه موده به د وروستۍ سیاسي هوکړې د بشپړېدو لپاره مهم فرصت وي.