وروستي ورښتونه؛ په هیواد کې یو شمېر بندونه له اوبو ډک شوي دي

د هلمند ولایت ځایي چارواکو ویلي، چې د کجکي بند د اوبو د زېرمه کولو بشپړ ظرفیت ته رسېدلی او د اوبو د وتلو لارو د بیارغولو چارې هم روانې دي، څو د رسوباتو له امله له لاسه تللی ظرفیت بېرته ورغول شي. دا پرمختګ داسې مهال دی چې په وروستیو کلونو کې د وچکالۍ له کبله د هېواد ډېری بندونه د اوبو له کمښت سره مخ وو. په ورته وخت کې، د وروستیو ورښتونو له امله یو شمېر نور بندونه هم ډک شوي او چارواکو ویلي چې د ځینو بندونو اوبه د لومړي ځل لپاره د کرنیزو ځمکو د خړوبولو لپاره خوشې شوې دي، چې دا کار د کرنې لپاره مهم پرمختګ بلل کېږي.