بلوچستان کې د پراخې اورلګېدنې له امله ۴۵ کسان ټپيان شوي

د بلوچستان کوټې ښار ته نږدې په مستونګ لویه لاره د (لاک پاس) په سیمه کې د ګمرک په یوه ګودام کې سخت اورلګېدنه رامنځته شوې چې له امله یې لږ تر لږه ۴۵ کسان ټپیان شوي دي. په پېښه کې تر ۱۰۰ ډېر موټرونه سوځېدلي او د اور لمبې له ۲۳ ساعتونو وروسته هم نه دي کابو شوي. ځايي چارواکي وایي، په ټپیانو کې پنځه امنیتي سرتېري هم شامل دي او د ځینو روغتیايي وضعیت نازک دی. د راپورونو له مخې، د ګاز ډبې او کیمیاوي موادو شتون د اور شدت زیات کړی او د ژغورنې پر مهال د ګاز یو ټانکر هم چاودېدلی ده. چارواکو د کوټې ـ کراچۍ او کوټې ـ نوشکي لویې لارې تړلې دي او ویلي یې دي چې د ژغورنې عملیاتو له بشپړېدو وروسته به بېرته پرانیستل شي.