د ټاپي پروژې چارې؛ د افغانستان په خاوره کې په چټکۍ سره روانې دي

د کانونو او پټرولیم وزارت ویلي، چې د ټاپي سترې سیمه‌ییزې پروژې چارې د افغانستان په خاوره کې په چټکۍ سره روانې دي او د عملي پرمختګ کچه یې لوړه شوې ده. د یاد وزارت د ویاند همایون افغان د څرګندونو له مخې، وزیر هدایت‌الله بدري د خپل سفر پر مهال د ترکمن باشي بندر څخه لیدنه کړې او هلته یې د ټاپي پروژې اړوند د نلونو او تخنیکي تجهیزاتو د انتقال او د هرات برخې د رغنیزو کارونو بهیر له نږدې ارزولی دی. د یاد وزارت د مالوماتو له مخې، تر اوسه د افغانستان په خاوره کې د ټاپي پروژې شاوخوا ۶۳ کیلومتره نللیکه غځول شوې او د پاتې برخو لپاره ۱۲۵ کیلومتره مسیر هم پاک او چمتو شوی دی.