ابوظبۍ کې؛ د افغانستان او قزاقستان سفیرانو پر دوه‌ اړخیزو اړیکو خبرې کړې

په ابوظبۍ کې د افغانستان سفیر، مولوي بدرالدین حقاني، او د متحده عربي اماراتو لپاره د قزاقستان سفیر، راوان جومابیک، په یوه کتنه کې د دواړو هېوادونو د سیاسي، اقتصادي او سیمه‌ییزو اړیکو د پیاوړتیا په اړه خبرې کړې دي. سرچینې ویلي، چې په دې کتنه کې دواړو لورو د افغانستان د ثبات او هوساینې او همداراز د متقابل درناوي پر بنسټ د همکاریو د پراختیا پر اهمیت ټینګار کړی دی. د قزاقستان سفیر په اقتصادي، سوداګریزو او ښوونیزو برخو کې له افغانستان سره د همکارۍ لېوالتیا څرګنده کړه. بلخوا، د افغانستان سفیر د قزاقستان د مثبت دریځ او بشري مرستو مننه وکړه او ډاډ یې ورکړی، چې اسلامي امارت سیمه‌ییز ثبات، اقتصادي پراختیا او ګډو اغېزمنو همکاریو ته جدي پاملرنه لري.