یونیسف: په افغانستان کې به ۱۰ زره کورنیو ته د ماشوم پالنې روزنه ورکړل شي

د ملګرو ملتونو د ماشومانو د ملاتړ صندوق (یونیسف) راپور ورکړی، چې د «ماشومتوب د ودې» پروګرام له لارې به په افغانستان کې ۱۰ زره کورنیو ته د ماشوم پالنې مهارتونه وړاندې شي. د یونیسف د مالوماتو له مخې، دا پروګرام د نړیوال بانک په ملاتړ د هېواد په شپږو ولایتونو کې پلي کېږي او موخه یې د ماشومانو په پالنه کې د کورنیو د رول پیاوړتیا او د ودې لپاره د مناسب چاپېریال رامنځته کول دي. راپور زیاتوي چې د دې پروګرام له لارې به شاوخوا ۲۰ زره ماشومان په مستقیم ډول له بېلابېلو خدماتو او ملاتړ څخه برخمن شي. یونیسف ټینګار کړی چې کورنۍ د ماشومانو لومړني ښوونکي دي او د ماشوم پالنې د مهارتونو د پیاوړتیا لپاره لا ډېرې مرستې او ملاتړ ته اړتیا لري.