ملګري ملتونه: افغانستان د راستنېدونکو له یوې سترې څپې سره مخ دی

ملګرو ملتونو خبرداری ورکړی چې افغانستان د راستنېدونکو د یوې سترې څپې سره مخ دی او د ۲۰۲۶ له پیل راهیسې له ایران او پاکستانه تر ۷۰۰ زره ډېر افغانان بېرته هېواد ته ستانه شوي دي. د ملګرو ملتونو د کډوالو عالي کمېشنرۍ د معلوماتو له مخې، یوازې له پاکستانه شاوخوا ۴۰۰ زره کسان راایستل شوي او په وروستیو کلونو کې میلیونونه افغانان بېرته افغانستان ته ستانه شوي یا ستنېدو ته اړ شوي دي. تر دې وړاندې ملګرو ملتونو خبرداری ورکړی و چې د روان کال تر پایه به نږدې ۲.۷ میلیونه نور افغان کډوال هم هېواد ته راستانه شي.