د چين د کمونېست ګوند د مرکزي کمېټې عمومي منشي او دولت رئیس شي جين پينګ د جون د ۸مې نېټې په ماسپښين په پينګ يونګ کې د کوريا ډیموکراتیک ولسي جمهوریت د کارګرو ګوند د عمومي منشي او د دولتي شورا له رئیس کيم جونګ اون سره خبرې اترې وکړې.
شي جين پينګ په خپلو خبرو کې وویل، چې هغه غواړي له عمومي منشي کيم جونګ اون سره ګډ کار وکړي، تر څو دا سفر په نوې زمانه کې د چين او ډیموکراتیکې کوریا د اړيکو د لوړ پوړي ډيزاين او ستراتيژيکې لارښوونې د پياوړتيا، له وخت سره سم د دواړو هېوادونو د اړيکو د پرمختګ د هڅولو، د دواړو هېوادونو او د هغوی د خلکو د ګټو او د سيمه ييزې او نړيوالې سولې، ثبات، پرمختګ او سوکالۍ لپاره فعال خدمتونه وکړي.
شي جين پينګ د چين او ډیموکراتیکې کوریا د اړيکو د پرمختګ په اړه څلور وړاندیزونه وکړل:
لومړی، د لوړ پوړي تګ راتګ تر لارښوونې لاندې د سياسي متقابل باور بنسټ ټینګ کړو.
دوهم، د خلکو د ګټو په موخه خپلمنځي عملي همکارۍ پياوړې کړو.
درېیم، د دواړو هېوادونو د دوستۍ خپرول د خوځنده ځواک په توګه د خلکو ترمنځ اړیکې پیاوړې کړو.
څلورم، د عدالت پر اصولو ټینګار وکړو او د ستراتیژیکو همکاریو مفهوم بډایه کړو.
کیم جونګ اون په خپلو خبرو کې وویل، چې عمومي منشي شي جین پینګ اووه کاله وروسته یو ځل بیا ډیموکراتیکې کوریا ته سفر کوي. هغه زموږ د خلکو لپاره یو ډېر د درناوي وړ مېلمه دی او موږ یې تود هرکلی کوو.
کیم جونګ اون وویل، چې موږ به د تل لپاره د ډیموکراتیکې کوریا او چین د اړیکو پرمختګ د هېواد تر ټولو مهم او لومړنی ستراتیژیک کار وګڼو. موږ به هڅه وکړو چې له چین سره اړیکې د دولت په کچه د اړیکو په یوه نمونه بدلې کړو او موږ به په ګډه د سیمه ییزې او نړیوالې سولې او سوکالۍ لپاره خدمتونه وکړو.
