د چين دولت رئيس شي جين پينګ د جون د ۱۶مې نېټې په سهار په پلازمېنې بېجينګ کې د ميانمار له ولسمشر مين اونګ هلاینګ سره لیدلي دي.
نوموړي له ميانماري سیال سره په خبرو کې ويلي، چې چين او ميانمار ژوره دوستي لري، دواړه هېوادونه د ډيپلوماتيکو اړيکو له جوړېدو راهيسې په سختو او نازکو وختونو کې تل يو له بل سره درېدلي، په ګډه يې د سوله ييز ګډ ژوند پنځه اصول عملي کړي او د مساواتو او ګډو ګټو پر بنسټ یې د هېوادونو ترمنځ د اړيکو ښه نمونه جوړه کړې ده.
شي جين پينګ ويلي، سږ کال د چين د ۱۵م پنځه کلن پلان پيل دی او هېواد به یې له ميانمار سره خپلې پرمختيايي تجربې شريکې او د سياسي دوستۍ، متقابل باور، ګډو ګټو، همغږي امنيت او کلتوري تبادلې پر بنسټ د چين- ميانمار د ګډ برخليک ټولنه جوړه کړي، د دواړو هېوادونو خلکو ته به لا زياتې ګټې ورسوي او د سيمه ييزې سولې او پرمختګ لپاره به ډېر کوښونه وکړي.
مین اونګ هلاینګ د میانمار د پرمختګ، ثبات او سولې لپاره د چین له اوږدمهاله ملاتړ څخه مننه کړې او ویلي يې دي، چې هېواد يې د یو چین پېژندنې پر اصل ټينګار ولري.
نوموړي ويلي، د چین ۱۵م پنځه کلن پلان به د ګاونډیو اسیایي هېوادونو لپاره د پام وړ انکشافي فرصتونه برابر کړي.
د چين او میانمار اړوندو ادارو د دواړو هېوادونو مشرانو په حضور کې د ټرانسپورت او د خلکو د ژوند په څېر مهمو برخو کې همکاريز سندونه لاسلیک کړي دي.
