امریکايي رسنیو له تهران سره د واشنګټن د جګړې د لګښت په راپورونو کې ويلي، چې پنټاګون له ایران سره د جګړې د لګښت د پوره کولو لپاره ۸۰ میلیارډه ډالرو ته اړتیا لري او د دغې جګړې عمومي لګښت یې ښايي له ۵۰ تر سل ميلیارډو ډالرو پورې وي.
امريکایان به د دې جګړې لپاره څه باندې ۶۰ میلیارډه ډالره ورکړي.
د پنټاګون د جګړې ياد لګښت د نړيوالو رسنيو پاملرنه راجلب کړې ده.
دغه پیسې چېرته ځي؟
امريکا د ایران پر ضد د جګړې پیسې څنګه لګولي؟ په حقیقت کې د جګړې په بهیر کې د دغه هېواد د پوځي تصدیو لخوا د پیسو د ګټلو لارې ښکاره دي، یعنې په جګړه کې کارول کېدونکې وسلې د پوځي تصدیو په سپارښتنو بدلېږي، چې په دې سره د حکومت پوځي بودیجه لوړېږي او پوځي تصدۍ ترې ښې ګټې اخلي.
جګړه د امریکا د پوځي تصدیو سوداګري ګرځېدلې او د ايران پر وړاندې جګړې کې يې ډېرې ګټې ترلاسه کړې دي.
د امریکا دفاع وزارت د ایران د جګړې په پیل کې له کانګرېس څخه د څه باندې ۲۰۰ میلیارډو ډالرو غوښتنه کړې وه.
د هاروارډ پوهنتون د کینیدي پوهنځي د عامه مالیې د چارو کارپوهې لینډا بیلمیس رسنيو سره په خبرو کې ويلي، چې له ایران سره د امریکا د جګړې عمومي لګښت ښايي یو ټریلیون ډالرو ته ورسېږي.
امریکا د براون پوهنتون اړوندې شمېرې ښيي، له ۲۰۲۰م کال څخه تر ۲۰۲۴م کال پورې، امریکايي تصديو له پنټاګون څخه د ۲۴۰۰ میلیارډو ډالرو په ارزښت سپارښتنې ترلاسه کړې دي.
د امریکا دفاع وزارت په ۲۰۲۵م کال کې د ۲۰۲۶م مالي کال لپاره دفاعي بودیجه ۱ اعشاریه صفر یو ټریلیون ډالرو ته لوړه کړه او نوی تاریخي ریکارډ یې جوړ کړ.
څوک به د جګړې بېل پر غاړه واخلي؟
د امریکايي کارپوهانو په اند، د ایران جګړې په شمول د بهرنیو پوځي عملیاتو د لوړ لګښت تر شا، د امریکا حکومت له پوځي تصدیو سره د ګټو د تضمین سیسټم جوړ کړی او د نظارت او څار میکانیزم يې فلج کړی دی.
د امریکا پوځي تصدۍ په بهرنیو جګړو کې ډېرې ګټې ترلاسه کوي، خو څوک يې بیې پرې کوي؟
د امريکا ملکي وګړي د دغو جګړو د لګښتونو قربانيان دي او درنې بیې یې پرې کوي.
د امریکا د موديز څېړنیز شرکت ارزونې ښيي، چې د ایران جګړې له امله امریکایانو شاوخوا ۱۳۲ میلیارډه ډالره زیان لیدلی او دغه شمېر لا هم مخ په زیاتېدو دی.
د امریکا دولتي ټلویزیون د دې هېواد د انرژۍ ادارې د شمېرو له مخې خبر ورکړی، چې امریکایان د تېلو د لوړو بیو له امله هره ورځ د ۵۰۰ میلیونو ډالرو په ارزښت اضافي لګښت پرې کوي.
برسیره پر دې، د امریکا ملګرو هېوادونو هم د دغې جګړې ډېر لګښت پر غاړه اخیستی دی.
راپورونه وايي، د امریکا بهرنیو چارو وزارت د تېر مارچ په ۱۹مه نېټه پر متحده عربي اماراتو، کویټ او اردن د ۱۶ اعشاریه ۵ میلیارډو ډالرو په ارزښت د وسلو د پلور پلان تصویب کړی، چې پکې د رادار او د ډرونونو ضد توغندیز سیسټم په شمول ځيني تجهیزات شامل دي.
دغه وزارت د تېرې مې په لومړۍ نېټې پر کویټ، عربي متحده اماراتو او بحرین د ۲۵ اعشاریه ۷ میلیارډو ډالرو په ارزښت د هوايي دفاعي سیسټم د پلور پلان هم تصویب کړی، چې په دې جملې کې يې تراوسه د ۱۷ میلیارډو ډالرو اعلان نه دی کړی.
امنیتي خطرونه را پورته کول، د سیمې جګړې را پارول او د سیمې پر هېوادونو وسلې پلورل او بیا له ملګرو څخه شتمني ترلاسه کول، د واشنګټن د بهرنیو جګړو حساب دی.
