وروسته له ۵۵ کلونو؛ د امنیت شورا تالار ته د لمر وړانګې د ننه شوې

تر نېمې پېړۍ ځنډ وروسته د لومړي ځل لپاره د ملګرو ملتونو امنیت شورا ته د لمر وړانګې د ننه شوې. تاسې به د امنیت شورا د غونډو د تالار تیاره او تت انځورونه لیدلي وي، دغه ځای لوړي کړکۍ لري، خو کابو ۵۵ کاله کېدل چې دغه کړکۍ د امنیتي مسایلو له امله پوښل شوې وې. المان چې ددغه شورا دوره يي مشري کوي د لومړي ځل لپاره دغه پردې او موانع لرې کړل او د امنیت شورا د غونډو تالار ته د لمر وړانګې د ننه شوې. په ۱۹۶۴ ز کال کې چې چه ګوارا په دغه تالار کې وینا کوله نو له لرې د ملګرو ملتونو پر ودانۍ برید وشو. له همدې ورځې وروسته دغه کړکۍ پوښل شوې وې. چه ګوارا هغه مهال د کیوبا د صنایعو وزیر و. المان د خپل ماموریت پر ټوېټر ددې ځای انځورونه خپاره کړي او وایي، د امنیت شورا د غړو تر منځ شفافیت باید سمبولیک نه وي، بلکې عملي بڼه دې ولري.