هرات کې د پروسس شویو تزئیني ډبرو صنعت پراخ شوی

د هرات د صنایعو او کانونو خونې مسوولین وایي، د دغه ولایت په صنعتي ښارګوټي کې د تزئیني ډبرو د تولید او پروسس ۴۵ فابریکې فعالیت لري چې د کورني بازار ترڅنګ یې محصولات بهرنیو بازارونو ته هم صادرېږي. د یادې خونې د معلوماتو له مخې، د هرات تولید شوې ډبرې ترکمنستان، ایران، یو شمېر عربي هېوادونو او د سیمې نورو بازارونو ته لېږدول کېږي. مسوولین وایي، د ډبرو په صنعت کې شوې پانګونې د صادراتو د زیاتېدو او د کاري فرصتونو د رامنځته کېدو زمینه برابره کړې ده. د صنعت کارانو په وینا، مرمر او ټراورټین ډبرې د بازار له پلوه ډېرې غوښتل کېږي او د افغانستان د ډبرو پروسس کول کولی شي د هېواد اقتصادي ارزښت څو برابره لوړ کړي.