ولسمشر محمداشرف غني وايي چې بهرنیو امنيتي کمپنۍ یا اجیرو پوځيانو ته به په افغانستان کې د فعالیت اجازه ورنه کړي.
وروسته له هغې چې د بلک واټر په نوم یوې خصوصي امریکايي جنګي کمپنۍ ته د افغانستان د جګړې د سپارلو مسئلې اندېښنې راپورته کړې، افغان ولسمشر محمد اشرف غني که څه هم په واضح ډول دا مسئله یاده نه کړه، خو ويې ویل چې هېڅ بهرنۍ مرسنرۍ ته به د افغانستان د امنیت ساتنې اجازه ورنه کړل شي.
مرسنري یوه بهرنۍ اجیره جنګي ډله ده چې هېڅ ډول پوځي مسوولیت نه لري او د پیسو په مقابل کې جنګېږي.
غني چې د دوشنبې په ورځ یې د افغانستان د ښاروالانو په درېیم ملي کنفرانس کې خبرې کولې، له ښاروالانو وغوښتل چې باید د ښارونو د امنیت ساتنې په برخه کې ولسي خلک هم شریک کړي.
نوموړي وویل، دی باور لري چې د امنیت د تینګښت په برخه کې چې کومه مرسته ولس کولای شي، هېڅ څوک يې نه شي کولای.
دا په داسې حال کې ده چې په دې وروستیو کې د بلک واټر کمپنۍ مسوول اېرېک پرېنس د افغانستان له یوه خصوصي ټلوېزیون سره په مرکه کې ویلي چې د افغانستان د جګړې د ژر پای ته رسېدو غوره لار، د دې جګړې خصوصي کول دي.
ده ویلي چې که د افغانستان جګړه ور وسپارل شي، د زرګونو مجهزو او تجربه لرونکو پوځیانو پر مټ به د افغانستان مخالفې وسله والې ډلې وځپي.
پخوا تر دې هم بلک واټر جنګي کمپنۍ لېوالتیا ښودلې وه چې د افغانستان روانه جګړه دې ور وسپارل شي، خو دا طرحه د افغانستان د ملي شورا او عامو خلکو له سخت غبرګون سره مخ شوې وه.
افغان حکومت او د امریکا متحده ایالاتو هغه وخت په دې اړه له څه ویلو ډډه کړې وه.
د مشرانو جرګې اداري پلاوي هم په دې اړه اندېښنه ښودلې او ویلي یې دي چې د بلک واټر په نوم خصوصي کمپنۍ ته د افغانستان د جګړې سپارل، د هېواد او خلکو په ګټه نه دي او دا جرګه به ورسره هېڅکله موافقه ونه کړي.
دفاع وزارت بیا دا خبرې د افغانستان د سولې او ثبات د دښمنانو تبلیغات بولي او رښتینې یې نه ګني.
په ورته وخت کې د افغانستان د ولسي جرګې رئیس عبدالروف ابراهیمي ويلي چې خصوصي شرکت ته د افغانستان د امنیت سپارل د اساسي قانون خلاف او د اندېښنې وړ عمل دی.
دی وایي:
«دا یوه نوې اندېښنه ده چې له خلکو سره پیدا شوې ده، د افغانستان د اساسي قانون له مخې، د هېواد امنیت ساتل د امنيتي بنسټونو مکلفیت دی، نو اوس پوښتنه دا ده چې څنګه کېدای شي چې یوه خصوصي کمپنۍ امنیت ټینک کړي، دا واقعاً د اندېښنې وړ ده».
د پوځي چارو افغان کارپوهان باور لري چې د افغانستان د جګړې خصوصي کول نه یوازې دا چې دا جګړه نه اراموي، بلکې په وړاندې يې د خلکو نفرت ډېرېږي چې په دا شان حالاتو کې هېواد د بحران پر لور ځي.
