که څه هم د سوډان دفاع وزیر د پوځي شورا له مشرتابه استعفا کړې، خو په دغه هېواد کې لاهم لاریونونه دوام لري.
جنرال عوض ابن عوف وړمه ورځ اعلان کړی دی، چې دی د پوځي شورا له مشرتابه استعفا کوي او له سلا مشورو وروسته دې پایلې ته رسېدلی، چې عبدالفتاح برهان عبدالرحمان د پوځي انتقالي شورا د رییس په توګه دا دنده مخته یوسي.
دا په داسې حال کې ده چې تر دې یوه ورځ وړاندې د د دغه هېواد ولسمشر عمرالبشیر له واکه لرې شو او جنرال ابن عوف د پوځي انتقالي شورا د مشر په توګه د سوډان واک ته رسېدلی دی.
خو له دې سره سره، اوس هم لسګونه زره لاریونوال چې سیاسي مخالفین دي، د دغه هېواد په پلازمېنه خرطوم کې د پوځ له خوا د واک اخيستو پر ضد لاریونونو ته دوام ورکوي .دوی وایي، تر هغو یې چې ټولې غوښتنې نه وي منل شوې، خپلو لاریونونو ته به دوام ورکړي.
د دغه هېواد پوځ اعلان کړی چې تر راتلونکو دوو کلونو پورې به د حکومت چارې د پوځ په لاس کې وي، خو لاریونوالو د پوځي وضعیت د رامنځته کېدو اعلان رد کړی او هغه د هېواد په زیان بولي. دوی دغه راز ټینګار کوي چې پوځ دې ډيموکراسۍ ته لار هواره کړي.
د اعتراض کوونکو دغه غورځنګ سمدستي یوه ملکي انتقالي حکومت ته د واک د سپارلو غوښتنه کړې ده.
بلخوا د سوډان واکمنې پوځي شورا ژمنه کړې چې یو ملکي حکومت به راولي. دې شورا وړمه ورځ ویلي، تمه لري چې دغه انتقالي دوره به تر دوو کلونو دوام وکړي او وروسته به ټاکنې کېږي.
شورا دغه اعلان هم کړی چې پخوانی ولسمشر عمرالبشیر به د ټولوژنې ادعاوو د سپینولو لپاره نړیوالې جنایي محکمې ته ونه سپارل شي، بلکې هغه به پخپله په سوډان کې محاکمه شي.
۷۵ کلن بشیر له تېرو شپاړسو اونیو راهیسې د هغه د دېرش کلنې واکمنۍ پر وړاندې، له اعتراضونو سره مخامخ و، چې وړمه ورځ د پوځ له خوا له واکه لرې شو.
بلخوا ملګرو ملتونو هم له پوځي انتقالي شورا غوښتي، چې د سوډان وګړو ته د دغه هېواد د سیاسي بحران په هواري کې برخه ورکړي.
