د امریکا د بهرنیو چارو وزیر مایک پامپیو ویلي، په دې کې شک نشته چې ایران په جنوبي امریکا کې مالي حضور لري او دغه هېواد لاهم یو نړیوال ګواښ دی.
پامپیو له پاراګوای څخه د لیدنې پر مهال له امریکا غږ سره په مرکه کې ویلي: «د ایران له پیسو په جنوبي امریکا کې د ناوړه موخو لپاره کار اخیستل کېږي او دغه هېواد د حزب الله، لویو جنایي سازمانونو او په ټوله سیمه کې د تروریستي اعمالو ملاتړ کوي».
نوموړي په خپلو خبرو کې د ایران ماهان هوایي شرکت ته هم اشاره کړې، چې تېره اونۍ یې له تهرانه د وینزویلا پلازمېنې کاراکاس ته مستقیمې الوتنې پیل کړې دي. دغه هغه هوایي شرکت دی چې واشنګټن په منځني ختیځ کې د جګړو سیمو ته د پوځي تجهیزاتو د لېږدولو په تور پرې بندیزونه لګولي دي.
پامپیو دا په جنوبي امریکا کې د ایران مداخله بللې او ویلي یې دي، چې هغه د جنوبي امریکا د خلکو ګټې نه خوندي کوي او متحده ایالتونه یې پر وړاندې اقداماتو ته تیار دي.
نوموړي زیاته کړې چې ایران په نړۍ کې د ترهګرۍ ستر ملاتړی هېواد او یو نړیوال ګواښ دی.
دا په داسې حال کې ده چې ایران له اوږدې مودې راهیسې په سیمه کې له وینزویلا سره چې په دې وروستیو کې له سیاسي شخړو سره مخ دی، نږدې اړیکې لري.
د وینزویلا اوسنی سوسیالېست ولسمشر نېکولاس مادورو په واټونو کې د مظاهرو او له خوان ګوایدو سره چې ځان یې په خپله د دغه هېواد ولسمشر اعلان کړی، د سیاسي شخړو له امله په قدرت کې د پاتې کېدو لپاره له ستونزو سره مخ دی.
روسیه، ایران، چین او کیوبا هغه هېوادونه دي، چې د مادورو ملاتړ کوي، خو د متحده ایالتونو په ګډون، ځینو غربي هېوادونو له خوان ګوایدو خپل ملاتړ اعلان کړی دی.
مادورو چې په ۲۰۱۳ ز کال کې د پخواني ولسمشر هوګو چاوېز تر مړینې وروسته قدرت ته رسېدلی، د تېر کال د مې میاشتې په ټاکنو کې بریالی اعلان شوی او د دویم ځل لپاره یې د ولسمشرۍ لوړه کړې ده.
د دغه هېواد اپوزیسیون چې له دغو ټاکنو سره یې پرېکون اعلان کړی او هغه یې له درغلۍ ډکې بللې دي، په مقابل کې یې پراخې مظاهرې کړې دي.
پامپیو چې دغه ټاکنې یې شرموونکې بللې، ویلي چې مادورو او همکارانو یې دغه هېواد وران کړی دی.
