عمران خان په ایران کې؛ دواړه لوري د ترهګرۍ ضد اقداماتو باندې خبرې کوي

د پاکستان لومړی وزیر به نن په ایران کې له لوړپوړو ایراني چارواکو سره لیده کاته ولري. عمران خان پرون تهران ته رسېدلی دی او ټاکل شوې چې له ایراني چارواکو سره د امنیت، ترهګرۍ ضد مبارزې او دوه اړخیزو اړیکو په اړه خبرې اترې ولري. دواړه لوري به همدا راز د ګډې پولې د امنیت په اړه هم بحثونه وکړي. عمران خان داسې مهال ایران ته سفر کړی، چې په دې وروستیو کې ددواړو لورو ترمنځ اړیکې ترینګلې شوې دي. ایران او پاکستان پر یو بل تور پورې کوي چې په خپله خاوره کې یې د ترهګرو مرکزونو ته ځای ورکړی دی. بل پلو د ایران او عربستان ترمنځ اړیکې ترینګلې دي، په داسې حال کې چې له پاکستان سره د سعودي عربستان اړیکې بیا تر ټولو نږدې دي. ایراني رسنیو تر دې وړاندې ویلي وو، چې سعودي عربستان ایران ته د عمران خان په سفر کې خنډونه هم جوړوي.