عمران خان: پاکستان او ایران د افغان سولې ملاتړ ته ژمن دي

شد پاکستان لومړي وزیر عمران خان د ایران له ولسمشر حسن روحاني سره تر لیدنې وروسته یوې خبري ناستې ته ویلي چې اسلام اباد او تهران په افغانستان کې د سولې غوښتونکي دي او په دې برخه کې له ټولو هڅو ملاتړ ته ژمن دي. عمران خان پرون له ایراني چارواکو سره د خبرو لپاره تهران ته تللی دی. عمران خان په خپلو خبرو کې ویلي چې ایران او پاکستان د افغانستان له څلوېښت کلن بحران نه اغېزمن شوي چې دواړو هېوادونو کې د افغان کډوالو موجودیت ددې اغېزمنتیا ښه بېلګه ده. هغه زیاته کړې، کله چې په افغانستان کې وضعیت ښه شي نو د اسلام اباد او افغانستان سوداګریزې اړیکې هم ورسره ښې کېدلی شي او دا چاره د سیمې پر اقتصاد هم ژوره اغېزه لري. نوموړي په ټینګار سره ویلي چې دوی به دافغان سولې لپاره خپلو هڅو ته دوام ورکړي څو په یاد هېواد کې تلپاتې سوله برقراره شي. په ورته وخت کې د ایران ولسمشر هم ویلي چې له عمران خان سره یې د دوه اړخیزو خبرو تر څنګ پر افغان سوله هم ګټورې خبرې کړې دي.