امریکا: د مالي سرچینو په اړه معلومات ورکوونکو ته جایزه ورکوو

د حزب الله ډلې د مالي سرچینو پر وچولو امریکا ۱۰ میلیون ډالر جایزه اعلان کړې ده. امریکا په ۱۹۹۷ کال حزب الله یوه ترهګره ډله وبلله چې په وینا یې،‌ د ایران له خوا یې ملاتړ کېږي، پیسې، وسلې او روزنه ورکول کېږي. امریکا اعلان کړی، چې د لبنان حزب الله ډلې د تمویلوونکو سرچینو په اړه يې کره معلومات ورکوونکو ته ۱۰ میلیون ډالر جایزه اعلان کړې ده. امریکا دا ګام داسې مهال اخیستی،‌ چې په لبناني حکومت کې د حزب الله ډلې د رول او نفوذ ډېرېدو په اړه د واشنګټن اندېښنې ډېرې شوې دي. همدارنګه، دغه ډله د سوریې په ملېشو کې ډېر نفوذ لري چې له کلونو راهیسې یې د سوریې د ولسمشر بشار الاسد ملاتړ کړی او په یمن کې د حوثیانو ملاتړ کوي. د امریکا د بهرنیو چارو وزارت مرستیال مایکل ایوانوف ویلي، دا جایزه هغو کسانو ته ورکول کېږي چې د حزب الله د مالي سیستم او هغو کسانو په اړه دقیق معلومات ولري چې دغه ډله اداره کوي او یا مالي ملاتړ ورته چمتو کوي. حزب الله یو سیاسي، پوځي او ټولنیز سازمان دی، چې د لبنان پارلمان او د حکومت په کابینه کې پراخ او قوي نفوذ لري.