د ایران د بهرنیو چارو وزارت د دغه هېواد د تېلو پر سکټور د امریکا بندیزونه غیرقانوني بللي دي.
د دغه وزارت ویاند عباس موسوي په تهران کې خبریالانو ته ویلي، چې دوی د امریکا پر وروستۍ پرېکړې چې پنځو هېوادونو ته نور د ایران د تېلو د پېرلو په برخه کې له بندیزونو معافیت نه تمدیدوي، غور کوي او پایله به یې د دغه هېواد مشرتابه ته وړاندې کړي، چې د هغې په رڼا کې به خپله پرېکړه ډېر ژر اعلان کړي.
دا په داسې حال کې ده چې ایران له دې مخکې هم څو ځله ګواښ کړی و، چې که د ایران د تېلو پر صادراتو د امریکا بندیزونه سخت شي، د نړۍ له قدرتونو سره د ۲۰۱۵ ز کال له اټومي تړونه به ووځي.
واشنګټن د تېر کال په مې میاشت کې له دغه تړونه وتلی او پر ایران یې د دغه هېواد د اټومي پروګرام په تړاو ځنډول شوي بندیزونه بېرته جاري کړي دي.
سپینې ماڼۍ ویلي چې د دې پرېکړې موخه دا ده، چې د ایران د تېلو صادرات صفر ته راکم شي او د ایران اوسنی رژیم د عوایدو له دې اساسي سرچینې بې برخې شي.
د امریکا د بهرنیو چارو وزیر مایک پامپیو ویلي، واشنګټن د سعودي عربستان او متحده عربي اماراتو په ګډون، د تېلو له سترو تولیدوونکو هېوادونو سره هر اړخیزې او ګټورې خبرې کړې، څو په بازار کې د تېلو د کمېدو مخنیوی یقیني کړي.
پامپیو په واشنګټن کې خبریالانو ته پر ایران د بندیزونو د سختولو په اړه ویلي: «نن په دغه اعلان سره موږ دا واضح کړه، چې په خپل هدف کې جدي يو. موږ به یې صفر ته ورسوو. دا چې څومره وخت به په دې کچه کې پاتې کېږو، دا کاملاً د ایران د اسلامي جمهوريت پر جګپوړو مشرانو پورې تړلې. موږ د ایران ستر مشر ایتالله علي خامنه یي او د هغه همکارانو ته خپلې غوښتنې ډېرې واضح کړې، چې د خپلو اټومي وسلو له تعقیبه لاس واخلئ، د بالسټیک توغندیو پراختیا او ازموینه ودروئ او د امریکایي اتباعو غیرقانوني نیونې بندې کړئ».
د واشنګټن د دغې پرېکړې له مخې، د مې له دویمې وروسته به پنځه هېوادونه چین، هند، جاپان، جنوبي کوریا او ترکیه له ایران څخه د تېلو د پېرلو په صورت کې، د امریکا له بندیزونو معاف نه وي.
د ولسمشر ټرمپ ادارې تر دې مخکې دا پنځه هېوادونه، له ایران څخه د تېلو د پېرلو په صورت کې، د مې تر دویمې له بندیزونو استثنا کړي وو.
د واشنګټن د دې پرېکړې پر وړاندې تر اوسه ترکیې او چین عکسالعمل ښودلی دی. د ترکیې د بهرنیو چارو وزیر مولود چاووش اوغلو په یوه ټوېټ کې ویلي، ترکیه یو اړخیز بندیزونه او له ګاونډیانو سره د اړیکو په برخه کې په دې ډول د نفوذ تحمیلول غندي.
بلخوا چین هم د امریکا پر دې پرېکړې توندې نیوکې کړې دي. د دغه هېواد د بهرنیو چارو وزارت ویاند، ګېنګ شوانګ پر هغو هېوادونو چې له ایران څخه تېل پېري، په یو اړخېز ډول د امریکا د بندیزونو لګولو پرېکړه غیرقانوني بللې ده.
