د ټاکنو خپلواک کمېسیون وایي، که کوم کس د ولسي جرګې د ټاکنو په ورځ څو ځله رایه ور کړي او د پولیسو یا کمېسیون له خوا ونیول شي، له پنځوس زرو تر یو لک افغانیو جرېمه کېږي.
د دغه کمېسیون مشر وايي: «خو که پولیسو وپېژاند، دا ښه نه ده چې هم یې تاوان وشي او هم یې ضمیر ملامت وي.»
د ټاکنو خپلواک کمېسیون د دوشنبې په ورځ د ۱۹ ولایتونو د رایه ور کوونکو د وروستي نوملړ په اعلانولو سره وویل، چې د ولسي جرګې د راتلونکو ټاکنو لپاره د رایه ور کوونکو شمېر ۸،۸ میلیونو کسانو ته ورسېد.
دا په داسې حال کې ده چې تر دې وړاندې دغه کمېسیون ویلي وو، چې د ولسې جرګې را روانو ټاکنو ته ۹،۵ میلیونه کسانو نوملیکنه کړې ده.
د ټاکنو خپلواک کمېسیون مشر دغه راز ویلي، د نږدې شپږ لکه رایه ورکوونکو نومونه یې له وروستي نوملړه ایستلي دي.
تر دې وړاندې دغه کمېسیون د ۱۴ نورو ولایتونو د رایه ور کوونکو وروستی نوملړ خپور کړی و. اوس یوازې په غزني کې د رایه ورکوونکو وروستی نوملړ پاتې دی، چې د کمېسیون په وینا ډېر ژر به هغه هم اعلان کړي.
د دغه کمېسیون په خبره، په غزني کې د رایه ورکوونکو د نومونو وروستی نوملړ به د هغې ځانګړې قانوني ټاکنیزې کمېټې له پرېکړې وروسته خپور شي، چې د ولسي او مشرانو جرګې استازي او پر اساسي قانون د څار بنسټ استازي یې غړي دي او د افغانستان امنیت شورا یې مشري کوي.
د ټاکنو خپلواک کمېسیون وایي، په کابل، ننګرهار، کندهار او بلخ ولایتونو کې ډېرو کسانو د رایه ور کوونکو په توګه نومونه ثبت کړي، په داسې حال کې چې دغه کچه بیا په زابل، اروزګان، بادغیس او ځینو نورو جګړه ځپلو ولایتونو کې ډېره کمه ده.
بلخوا د ټاکنیزو شکایتونو کمېسیون وایي، د شفافیت په موخه به د ولسي جرګې ټاکنو په ورځ د رایې ورکولو په هر مرکز کې خپل استازی ولري، چې شمېر به یې نږدې پنځو زرو کسانو ته رسېږي.
