هلمند کې افغان امنیتي سرچینو رسنيو ته ويلي چې وړمه ورځ مازديګر مهال د ښوراب له پوځي اډې څخه د نادعلي په ولسوالۍ کې د وسله والو طالبانو پر سنګرونو توغول شوی توغندی د افغان امنیتي ځواکونو په یو مرکز پرېوتی چې له امله یې شپږ افغان سرتېري وژل شوي او اته نور ټپیان شوي دي.
د هلمند امنیه قومندان مل پاسوال عبدالرزاق یعقوبي امريکا غږ ته ويلي چې د پېښې په تړاو د پلټنو لپاره يې نادعلي ولسوالۍ ته يو پلاوی استولی دی.
یعقوبي د پېښي او د اوښتې مرګ ژوبلي په اړه له تبصرې کولو ډډه کړې ده.
د هلمند یوه امنیتي مقام د نوم نه ښودلو په شرط امریکا غږ اشنا راډیو ته ويلي چې د لښکرګاه ښار په شمال کې د نادعلي ولسوالۍ د سیفن په سیمه کې د پوليسو او ملي پوځ ګډ نظامي عملیات له تېرو دوو اونیو راهیسې دوام لري.
نوموړي زیاته کړې، ګډ افغان ځواکونه او وسله وال طالبان د جګړې په سیمه کې په لنډه فاصله کې له یو بل سره مخامخ دي چې د وسله والو طالبانو پر ځای له ښوراب پوځي اډې څخه توغول شوی توغندی پر ګډو افغان ځواکونو لګېدلی دی.
سرچینې ویلي: «د ښوراب پوځي اډې څخه پرون ناوخته د لرې واټن ویشتونکي توغندي ویشتل شوي چې هدف يې د سیفن په ساحه کې د طالبانو د مرکز له منځه وړل وو، خو د غلطو معلوماتو له مخې توغندی پر ګډو افغان ځواکونو لګېدلی چې ۶ تنه پکې وژل شوي او ۸ تنه نور پکې ټپیان شوي».
نادعلي ولسوالي د لښکرګاه ښار سره په شمالي برخه کې نږدې پرته ولسوالي ده چې ډېری سیمې يې نا امنه دي.
د هلمند د والي ویاند عمر ځواک وايې چې د نادعلي ولسوالۍ او لښکرګاه ښار تر منځ د پرتو سیمو د تصفيې لپاره نظامي عملیات له تېرو څو اونیو راهیسې د ګډو افغان ځواکونو له خوا دوام لري.
د طالبانو یو ویاند قاري محمد یوسف احمدي د دې پیښې په اړه رسنیو ته په یوه استولې اعلامیه کې ادعا کړې چې د نادعلي ولسوالۍ د انجیر په سیمه کې د دوشنبې په ماسپښین لومړی د افغان امنیتي ځواکونو تر منځ نښتې شوې او بیا د امریکايي پوځ له لوري بمبار شوی چې له امله یې د دوو امریکایي سرتېرو په ګډون ۴۶ افغان امنیتي سرتېري وژل شوي او ۳۵ نور ټپیان شوي.
د طالبانو دا ادعا هېڅ کومې خپلواکې سرچینې تائید کړې نه ده.
