په خیبر پښتونخوا کې د حقاني مدرسه وايي، مولانا سمیع الحق له یو افغان پلاوي سره په افغانستان کې د روانې جګړې د ختمېدو په اړه خبرې کړې دي.
د طالب وسله والو ډېری جګړه مارانو او مشرانو په حقاني مدرسه کې زده کړې کړې او بيا جګړې ته تللي دي.
مولانا سمیع الحق د طالبانو معنوي پلار هم بلل کېږي او په افغانستان کې د طالبانو د روانې جګړې کلک ملاتړی دی.
د حقاني مدرسې چارواکي وایي، سمیع الحق د دوشنبې په شپه له افغان پلاوي سره لیدلي دي. په پلاوي کې د سولې د عالي شورا غړی عطاالله لودین، قسیم حلیمي او نور چارواکي شامل وو.
اسوشېتېډپرېس د حقاني مدرسې د چارواکو له خولې لیکلي چې سمیع الحق ورغلي پلاوي ته وویل: «زه هم غواړم چې جهاد ختم شي، وینې توېدنه ختمه شي افغانستان ازاد شي او اسلام پکې حاکم شي».
نوموړي د افغان او پاکستاني دیني عالمانو د یوې پټې غونډې د جوړولو وړاندیز هم کړی دی، داسې غونډه چې د هغه په خبره امریکایي چارواکي پکې نه وي.
پاکستان ته د دغه پلاوي د سفر په اړه تر دې دمه نه د افغانستان د سولې عالي شورا او نه هم کوم بل افغان چارواکي څه ویلي دي.
تېره جمعه د عطا الله لودین په مشرۍ د افغانستان د دیني عالمانو د شورا یو اووه کسیز پلاوی د پاکستان له دیني عالمانو سره د دواړو هېوادونو د دیني عالمانو د ګډې غونډې د جوړېدو په اړه د خبرو لپاره اسلام اباد ته ولاړ.
د سولې د عالي شورا ویاند سید احسان طاهري امریکا غږ ته ویلي وو چې پلاوی به د پاکستان له دیني عالمانو سره خبرې وکړي.
کابل په وار وار دا خبره کړې ده چې د پاکستان په مدرسو کې افغانانو او نورو ته افراطیت ښودل کېږي او بیا له هغه ځایه افغانستان ته د جنګ لپاره استول کېږي؛ خو پاکستاني چارواکي دا تورونه نه مني.
افغان حکومت دغه راز پاکستان تورنوي چې طالب مشرانو ته یې په خپله خاوره کې ځای ورکړی، روزنه او پالنه يې کوي او بیا یې افغانستان ته د ورانکاريو لپاره استوي.
