افغان امنیتي ادارې: وسله والې ډلې تر فشار لاندې دي او تلفات یې ډېر شوي دي

افغان حکومت وايي وسله وال طالبان او نورې ترهګرې ډلې تر سخت فشار لاندې دي. د کورنیو چارو وزارت ویاند نصرت رحیمي نن په یوه خبري غونډه کې وویل، چې همدا اوس په څو ولایتونو کې چاڼیز عملیات روان دي او ګڼ طالبان پکې وژل شوي، نیول شوي او ټپیان شوي دي. دده په وینا په دې وروستیو کې د افغان ځواکونو د مرګ ژوبلې کچه را ټيټه شوې ده، خو برعکس د وسله والو مخالفینو د مرګ ژوبلې شمېره لوړه شوې ده. هغه وویل، افغان ځواکونه هڅه کوي د ټاکنو لپاره زمینه برابره کړي چې په همدې موخه یې پراخ عملیات روان کړي دي. هغه زیاته کړې، چې د عملیاتو په برخه کې د افغان ځواکونو او بهرنیانو ترمنځ پوره همغږي شته ده او جګړه تر ډېره د افغان ځواکونو له لوري رهبري کېږي. رحیمي د پاکستان د بهرنیو چارو وزارت هغه تورونو هم رد کړل، چې ګواکي د ترهګرو مرکزونه په افغانستان کې دي. دده په خبره دا ټولې نړۍ ته معلومه ده، چې ترهګر چېرته دي، څوک یې ملاتړ کوي او څوک د روزنې او تجهیز زمینه ورته برابروي.