د ټاکنو خپلواک کمېسیون ويلي، د ولسمشریزو ټاکنو لپاره د رایې ورکوونکو د نوملیکنې حساس مواد اتو ولایتونو ته لېږل شوي دي.
د دغه کمېسیون د ویاند دفتر سرپرست ذبیحالله سادات ازادي راډیو ته ویلي، په دغو ولایتونو کې ټاکنیز حساس مواد یا هېڅ نهوو او یا که وو هم، خو د رایې ورکوونکو د نوم ثبتولو لپاره کافي نه وو.
نوموړي زیاته کړې: «له امنیتي اړخه هېڅ اندېښنه نشته، امنیتي بنسټونو ډاډ راکړی چې د حساسو او غیر حساسو موادو لېږد د اتو ولایتونو ولسوالیو ته پیل شوی او ادامه لري چې د جوزا په ۱۸مه به تقویتي نوملیکنه پیل کړو».
دغه کمېسیون په ۲۶ ولایتونو کې د جمهوري ریاست د ټاکنو لپاره د رای ورکوونکو د نوملیکلو په خاطر په هغو حساسو ټاکنیزو موادو بسنه کړې، چې د ولسي جرګې په ټاکنو کې کارېدلي وو.
پکتیا، میدان وردګ، پروان، پنجشېر، غزني، خوست، ننګرهار او نورستان هغه ولایتونه دي، چې ټاکنیز حساس او غیر حساس مواد ورلېږل شوي دي.
په دغو حساسو ټاکنیزو موادو کې د رای ورکوونکو د نوم ثبتولو پاڼې، سټېکر، محافظتي کڅوړې، رنګ، د رایو صندوقونه، غرفې او قرطاسیه شامل دي.
دا په داسې حال کې ده چې ټاکل شوې د ولسمشریزو ټاکنو لپاره د رای ورکوونکو د نوملیکنې لړۍ د جوزا په ۱۸مه پیل او د سرطان د میاشتې تر لومړۍ نېټې پورې دوام وکړي.
دغه کمېسیون پرېکړه کړې چې د راتلونکو ټاکنو لپاره په ټول هېواد کې د نوملیکنې ۴۵۸ مرکزونه پرانیزي، چې له دې جملې ۲۷۴یې غزني ولایت ته په پام کې نیول شوي دي.
په دغه پروسه کې هغه کسان چې هېواد ته راستانه شوي، قانوني عمر ته رسېدلي او یا د ولسي جرګې په ټاکنو کې له نوملیکنې پاتې شوي، نوملیکنه کولای شي.
بلخوا د ازادو او عادلانه ټاکنو د بنسټ اجرایوي ریيس یوسف رشید ويلي، په غزني ولایت کې د ناامنیو د راپورونو له مخې، د ټاکنو خپلواک کمېسیون نه شي کولای چې په ډېری ولسوالیو کې د نوم ثبتولو مرکزونه پرانیزي.
هغه زیاته کړې: «۲۵۰۰ مرکزونه تړل شوي، کومې سیمې چې خلک پکې نوملیکنه کوي، باید روښانه شي او باید ویې لرو. بله دا چې د ځینو ولسوالیو اداره کله د دولت او کله د مخالفینو په واک کې وي او هغه ولسوالۍ چې وروسته د امنیتي ځواکونو لاس ته ورغلې، د دوی لپاره څه پروګرام لري؟ په ټوله کې د دوی په کارونو کې د پروګرام نشتوالی وینم، د حساسو موادو خوندیتوب بل جدي بحث دی».
