لویې څارنوالۍ ويلي، د حبیبالله احمدزي له لوري په ارګ کې د اخلاقي فساد د لګول شویو تورونو قضیه ورته رسېدلې ده.
د دې ادارې ویاند جمشید رسولي تېره ورځ په کابل کې یوې خبري ناستې ته ویلي، چې د دغې قضیې د څېړنې په موخه پلاوی ټاکل شوی او له احمدزي غوښتنه شوې چې اسناد او شواهد وړاندې کړي.
هغه زیاته کړې: «د افغانستان لويې څارنوالۍ د دې ترڅنګ چې د قضیې د څېړنې لپاره يې پلاوی ټاکلی، له ښاغلي احمدزي هم غوښتنه شوې چې د روانې اونۍ تر پنجشنبې ورځې پورې په دې اړه خپل ټول شواهد او اسناد له ټاکل شوي پلاوي سره شریک کړي، څو پلاوی وتوانېږي چې د همدغو اسنادو او شواهدو په استناد خپلې څېړنې مخ په وړاندې یوسي».
تر دې وړاندې د ولسمشرۍ ماڼۍ مرستیال ویاند صمیم عارف هم ازادي راډيو ته ویلي وو، چې یاده قضیه لويې څارنوالۍ ته استول شوې ده.
دا په داسې حال کې ده چې په امنیتي چارو کې د ولسمشر غني پخواني سلاکار حبیبالله احمدزي په خپلو تازه څرګندونو کې په ارګ کې د اخلاقي فساد د موجودیت ادعا کړې ده.
احمدزي ویلي چې په ارګ کې ځینې کسان د فحشاوو د خپرولو لپاره په سیستماتیک ډول کار کوي.
نوموړي دغه راز تور پورې کړی چې د ولسي جرګې د ټاکنو ځینې ښځينه نوماندانې چې له ۶۰۰ څخه کمې رایې یې وړې وې، د ارګ له لوري د نامشروع اړیکو له مخې ولسي جرګې ته بریالی شوې دي.
د ولسمشر ویاند هارون چخانسوري بیا د احمدزي دغه څرګندونې شخصي عقده بللې او غوښتنه یې کړې چې باید ثبوت یې وړاندې کړي.
د ښاغلي احمدزي دغو څرګندونو په پراخه کچه غبرګونونه هم راپارولي دي. د ملي یووالي حکومت اجرایه ريیس عبدالله عبدالله هم په ارګ ماڼۍ کې د اخلاقي فساد په اړه راپورونه ټکان ورکوونکي بللي او په دې برخه کې يې پر جدي پلټنو ټينګار کړی دی.
