نجیب الله احمدزی: د کمېسیون ظرفیت ته په کتو ښايي ټاکنې پرخپل وخت ونه شي

د ولسمشریزو ټاکنو لپاره د تقویتي نوملیکنې له پیلیدو سره هممهاله، د ټاکنو خپلواک کمېسیون پخواني چارواکي ددغه کمېسیون پر تخنیکي ظرفیت شک ښيي. د ټاکنو خپلواک کمېسیون پخوانی رییس نجیب الله احمدزی وايي چې کمېسیون له تخنیکي او مالي پلوه ددې ظرفیت نه لري، چې د میزان پر شپږمه ولسمشریزې ټاکنې ترسره کړي. تازه د ټاکنو خپلواک کمېسیون د ولایتي شوراګانو او د غزني د ولسي جرګې ټاکنې ځنډولې دي. د ټاکنو کمېسیون پخواني چارواکي وايي د ولایتي شوراګانو، ولسوالیو شوراګانو ټاکنو ځنډول د انتخاباتو مشروعیت ځکه تر پوښتنې لاندې راولي، چې پنځوس سلنه واجد شرایط رایه کاروونکي به په ټاکنو کې ګډون ونه کړي. د ټاکنو کمېسیون ټکنۍ چارې او له مالي او تخنیکي پلوه نه چمتووالی د میزان په شپږمه د ولسمشریزو ټاکنو پر وخت ترسره کولو پر وړاندې خنډونه شمېرل کېږي.