هرات کې ترافیکي پېښې ۱۱ کسانو ته مرګ ژوبله اړولې

هرات ښار کې د ترافیکي پېښې له امله درې کسان مړه او اته نور ټپیان شوي دي. د هرات د حوزوي روغتون سرطبیب، ډاکتر عارف جلالي وویل، چې دا ترافیکي پېښه تېره شپه د هرات ـ اسلام کلا پر لویه لار رامنځته شوې ده. د جلالي په خبره، د یادې پېښې ټپیان چې ټول سړي دي د سرپل، تخار، بادغيس فراه، او هرات ولایتونو اوسېدونکي وو. هغه زیاته کړه، چې د یوه ټپي روغتیايي حالت نازک دی. د ډاکتر جلالي د معلوماتو له مخې، د یادې پېښې د ټپیانو هویت نه دی په ډاګه شوی. د راپورونو له مخې، تېره شپه نهه بجې یوه مسافر وړونکې کرولا له هرات ښار نه د اسلام کلا په لور روانه وه چې د زنده جان ولسوالۍ په رباط پریان سیمه کې یې له یوه زرنج موټرسایکل سره ټکر کړی دی. ویل کېږي چې د پېښې وژل شوي او ټپیان د ایران پر لور روان وو.