ځينې سياسي ګوندونه وايي، د ټاکنو خپلواک کمېسيون باید د هغو سيمو رايې باطلې کړي چې پېژندګلوي يې د بايومېټريک سيسټم له لوري ناشونې وي.
د ټاکنو د شفافیت لپاره د افغانستان د ۳۵ لویو او کوچنیو ګوندونو او سیاسي جریانونو ائتلاف پرون په یوه اعلامیه کې د ولسي جرګې په ټاکنو کې د بایومېټریک سیسټم کارونه یو ښه پرمختګ ګڼلی، خو د ټاکنو د بهیر د لا روڼتیا لپاره یې یو شمېر نور وړاندیزونه هم کړي، چې پکې په هغو سیمو کې چې انټرنېټ او برېښنا شتون ولري، په انلاين بڼه د ټاکنو د ترسره کېدو غوښتنه هم شامله ده.
د سیاسي ګوندونو او جریانونو د ائتلاف په اعلامیه کې، چې د یو خبري کنفرانس په ترڅ کې له خبریالانو سره شریکه شوه، ویل شوي: «د هېواد په هغو سیمو کې چې د انټرنېټ او برېښنا اسانتیاوې شته، ټاکنې دې په انلاين ډول ترسره شي، ځکه چې په افلاين ډول د تکراري رایو مخنیوی او د باطلو رایو تصفیه په یوه ننګوونکې پروسه اوړي.»
همدارنګه په اعلامیه کې د ټاکنو له خپلواک کمېسیون څخه غوښتل شوي چې د هغو سیمو رایې دې باطلې اعلان کړي چې د رایې ورکوونکو پېژندګلوي پکې د بایومېټریک سیسټم له لارې ونه شي.
اعلامیه وايي: «بایومېټریک پروسه باید په پراخ او ټول شموله توګه عملي شي او په هغو سیمو کې، چې دا پروسه عملي نه شي د یادو سیمو رایې دې بې اعتباره اعلان شي.»
د ټاکنو د شفافیت لپاره د افغانستان د ۳۵ لویو او کوچنیو ګوندونو او سیاسي جریانونو د ائتلاف په نورو غوښتنو کې سیاسي ګوندونو او مدني بنسټونو ته په مرکز کې له ډېټا، سرور او نورو تخنيکي پروسو څخه د څار حق ورکول او د رایې ورکوونکي د انځور، د هغه د پېژندپاڼې د انځور او دوو ګوتو نښان ثبتول هم شامل دي.
سیاسي ګوندونه د ټاکنو له کمېسیون غواړي، څو هغو افغانانو ته په ټاکنو کې د ګډون حق ورکړي چې د افغانستان د تابعیت تذکره ولري او عمرونه یې تر اتلسو کلونو لوړ وي.
ګوندونو او جریانونو دغه راز پر کمېسيون غږ کړی چې د بايومېټريک سيسټم مؤثريت دې ورته ثابت کړي او افغانانو ته دې له بهرني شرکت سره د بايومېټريک سيسټم د چمتو کولو د تړون جزئيات روښانه کړي.
