د بدخشان د سرو زرو او د بلخاب د مسو کانونو د را سپړنې تړونونه د امريکا په پلازمېنه واشنګټن کې لاسليک شوي دي.
په واشنګټن کې د افغانستان د سفارت له خوا په خپره شوې خبرپاڼه کې راغلي چې دغه مهم تړونونه وړمه ورځ د کانونو او پټرولیم وزارت او د «سنټرال لمېټېډ» شرکت تر منځ په واشنګټن ډي سي کې د افغانستان په لوی سفارت کې لاسلیک شول.
سرچينې زياته کړې، د افغانستان سفارت مستشار فضل الرحمن فضلیار د دغو تړونونو لاسلیک په افغانستان کې د پانګونې د ودې لپاره یو مهم ګام وباله.
د مالیې وزارت سرپرست او د زېربنا په چارو کې د ولسمشر غني ستر سلاکار ډاکټر همایون قیومي له خصوصي سکټوره د هغو پروژو د ملاتړ له امله مننه کړې چې د خلکو د ژوندانه په پرمختګ کې مرسته کوي.
د سنټرال کمپنۍ شریک سید سعادت منصور نادري او د دغه شرکت اجرائیوي ريیس ایننهم بیا په خپلو ویناوو کې په افغانستان کې د بهرنۍ سوداګرۍ د اهمیت او د خصوصي سکټور د ودې په اړه خبرې کړې دي.
هغوی دغه تړونونه د نورو پانګه والو د هڅولو لپاره چې په افغانستان کې پانګونه وکړي، مهم بللي دي.
د افغانستان د کانونو د څار ټولنو د بدخشان د سرو زرو او د سرپل د مسو کانونو قراردادونه «د افغانستان د کانونو په اړه نړيواله دسيسه» ګڼلې ده.
د افغانستان د روڼتيا د څار ادارې مشر اکرام افضلي هم تېره اونۍ په يو خبري کنفرانس کې ويلي وو چې حکومت په دغو دوو سترو قراردادونو کې سياسي معامله کړې ده.
د کانونو او پټروليم وزارت وياند عبدالقدير مطفي پرون په کابل کې يوې خبري غونډې پرمهال پر يادو تړونونو د ځينو ټولنو له خوا شوې نيوکې رد کړې او ويې ويل چې د دغو کانونو په تړونونو کې ټول قوانين په نظر کې نيول شوي دي.
نوموړي د روڼتيا د څار ادارې اعتراضونه بې ځايه وبلل او په ډاګه يې کړه چې د نړيوالو شرکتونو باور ته زيان رسوي او د نړيوالو پانګه والو مخه ورسره نيول کېږي.
د مطفي په وينا، ټاکل شوې چې د يادو شرکتو له خوا د دغو کانونو د اکتشاف په برخه کې ٨٠ ميليونه امريکايي ډالر پانګونه هم وشي.
د کانونو وزارت وياند وويل چې له دغو قراردادونونو سره به سلګونو کسانو ته د کار زمينه هم برابره شي.
د کانونو او پټروليم وزارت د حقوقي چارو رييس ولي الله ځدراڼ يادې خبري غونډې ته وويل چې د بدخشان د سرو زرو او د سرپل د مسو کانونو قراردادونه په ٢٠١٢ زېږديز کال کې نهايي شوي وو خو د ځينو وړو اختلافاتو له امله ځنډول شوي وو.
هغه ادعا وکړه چې اوس دا اختلافات او ستونزې هوار شوي دي.
ځدراڼ وايي چې دا ستونزې او اختلافات د يوې حقوقي کمپنۍ (ډيلي پيپر) له خوا حل شوي او د ګټو د تضادونو مشکل هم هوار شوى دى.
د بدخشان د سرو زرو کان د دغه ولايت د مرکز فيض اباد ښار په ٥٠ کيلومترۍ کې شمال لور ته په راغ ولسوالۍ کې موقعيت لري. دغه کان دوه متره سور او ٣٥٠ متره اوږدوالى لري، خو دا چې څومره سره زر لري، تر اوسه سمه سروې نه ده شوې.
د سرپل د بلخاب د مسو کان له ٤٥٧ کيلومتره مربع مساحت سره په بلخاب ولسوالۍ کې د ولايت د مرکز په ١٥٠ کيلومترۍ کې موقعيت لري، چې د نړۍ له سترو کانونو څخه ګڼل کېږي.
دغه کان په ١٩٧٢ کال کې کشف شوى، ٤٠٠ متره سور او ٥٠٠٠ متره اوږودوالى يې تخمين شوى دى.
