وسله وال طالبان وايي د وردګو ولایت سید اباد ولسوالي یې نیولې ده

وسله وال طالبان وايي د وردګو ولایت سید اباد ولسوالي یې نیولې ده. د وسله والو طالبانو ویاند ذبیح الله مجاهد رسنیو ته په استولې خبرپاڼه کې ویلي چې د وردګو ولایت سید اباد ولسوالي یې نیولې ده. نوموړي زیاته کړې چې وسله والو طالبانو تېره شپه ددغه ولسوالۍ پر امنیتي پوستو او امنیه قومندانۍ بریدونه کړي دي او ګڼو سرتېرو ته یې مرګ ژوبله هم اړولې ده. د میدان وردګو د ولایت مقام ویاند عبدالرحمن منګل بیا وایي چې ولسوالي سقوط شوې نه ده، خو جګړه شوې ده. دده په خبره د افغان ځواکونو او طالبانو ترمنځ جګړه شوې ده خو طالبان نه دي بریالي شوي چې دغه ولسوالي ونیسي. د میدان وردګو د امنیه قومندانۍ ویاند حکمت دراني بیا له رسنیو سره په خبرو کې ویلي، چې افغان ځواکونو د ولسوالۍ مرکز ته رسېدلي دي او ولسوالي د افغان پوځیانو په لاس کې ده. دده په خبره د کابل کندهار لویه لاره هم د ترافیکو پر مخ خلاصه شوې ده. نوموړي د سید اباد ولسوالۍ د امنیه قومندان وژل کېدل هم تایید کړي خو د نورې مرګ ژوبلې په اړه یې معلومات نه دي ورکړي.