د غزني چارواکي وايي، وسلهوالو طالبانو د کابل-کندهار د لويې لارې پر امتداد، څو لوی او واړه پلونه الوځولي او پر پاخه سړک تګ راتګ یې بند کړی دی.
له دې امله د سیمې خلک، مسافر وړونکي موټر او د بار وړونکو موټرو چلوونکي مجبور دي چې له پاخه سړکه واوړي او په خامه لارو په هغو سیمو کې چې د وسله والو طالبانو تر ولکې لاندې دي، ت
راتګ وکړي.
په سیمه کې یو شمېر خلکو ازادي راډیو ته ویلي چې وسله وال طالبان له هغو خلکو چې د کابل-کندهار د لویې لارې د تخریبېدو له امله پر خامه لارو سفر ته مجبور دي، د مالیې په نوم پيسې هم اخلي.
وسله والو طالبانو تر اوسه په دې اړه څه نه دي ویلي.
د غزني د والي ویاند، محمد عارف نوري ازادي راډیو ته ویلي چې وسله والو طالبانو په قره باغ ولسوالۍ کې څو پلونه تخریب کړي او د کابل-کندهار لويه لاره يې د ټرافيکو پر مخ تړلې ده.
نوري زياته کړې: «زموږ امنیتي ځواکونو احضارات پیل کړي او د ملي اردو نوي ځواکونه هم ور استول شوي او ډېر ژر به د دې سیمو او نورو ولسوالیو د پاکولو لپاره تصفیوي عملیات پیل شي».
د غزني د والي ویاند وړمه ورځ هم ويلي وو چې د غزني او پکتیکا د سړک پر امتداد هم له څلورو ورځو راهیسې عملیات روان دي او امنیتي پوستې به هم ځای پر ځای شي.
دا لومړی ځل نه دی چې د وسله والو طالبانو له لوري له خلکو د پيسو د اخيستلو خبرونه ورکول کېږي، بلکې تر دې وړاندې هم په ځلونو داسې راپورونه خپاره شوي چې ګنې وسله والو طالبانو په مختلفو سيمو کې ګمرکونه جوړ کړي او د ماليې په نوم له خلکو پیسې شوکوي.
