د افغانستان د ټاکنيزو شکايتونو خپلواک کمېسيون وايي، سره له دې چې د ولسي جرګې د راتلونکو ټاکنو د نوماندانو وروستی نوملړ خپور شوی، لا هم د ځينو نوماندانو د حذف کېدو احتمال پر ځای دی.
د ټاکنيزو شکايتونو د خپلواک کمېسيون غړي او وياند علي رضا روحاني رسنيو ته ويلي، ګڼ شمېر شکايتونه ور رسېدلي او ځينې داسې دوسيې هم د څېړل کېدو په حال کې دي چې اوس يې کارونه په بشپړېدو دي.
د ټاکنيزو شکايتونو کمېسيون ټولې پرېکړې وروستۍ دي او د ټاکنو د قانون د ۹۰ يمې مادې پر بنسټ د ټاکنيزو شکايتونو کمېسيون په ځينو مواردو کې ان له شکايت پرته هم د يو نوماند په تړاو څېړنې او پرېکړه کولی شي.
که څه د ټاکنيزو شکايتونو کمېسيون د ځينو نوماندانو د نومونو د حذف کېدو د احتمال خبر ورکړی، خو دا چې پر يادو کسانو شکايتونه ثبت شوي او که نه، شمېر يې څومره دی او کمېسيون به يې په تړاو وروستۍ پرېکړه کله کوي، څه نه دي ويل شوي.
د ټاکنيزو شکايتونو کمېسيون تر دې وړاندې هم د ولسي جرګې ټاکنو ته ۳۵ نوماندان له وروستي لېسته ايستلي وو چې د ولسي جرګې ۱۲ برحاله غړي هم پکې شامل دي.
د ولسي جرګې ټاکنې د تلې پر ۲۸مه کېږي. په دې ټاکنو کې له غزني پرته په ۳۳ ولايتونو کې ۲۵۶۵ کسان نوماندان دي چې د شاوخوا يو ميليون کسانو له لوري به رايې ورکړل شي.
نوماندانو ته د ټاکنيزو شکايتونو د خپلواک کمېسيون خبرداری په داسې حال کې دی چې ناپېژاندو وسله والو وړمه شپه د دغه کمېسيون د مشر عبدالعزیز اریايي پر کور دوه لاسي بمونه غورځولي دي.
پوليس چارواکي وايي، په پېښه کې اریایي او د هغه د کورنۍ غړو ته زیان نه دی رسېدلی.
د کابل د امنیه قوماندانۍ وياند بصیر مجاهد وايي چې وړمه شپه یوه بجه ناپېژاندو وسله والو د کابل ښار د درېیمې امنیتي حوزې د کارته سه په سیمه کې د اریايي د استوګنې په کور لاسي بمونه غورځولي دي خو چاته پکې زیان نه دی رسېدلی.
مجاهد زياته کړې: «له مخکې نه د ښاغلي اریايي د کور د امنیت لپاره ۱۷ کسیز امنیتي ټیم ګومارل شوی و».
د ټاکنیزو شکایتونو د کمېسیون د مشر پر کور د برید انګېزه لا معلومه نه ده، خو پولیس وايي، چې له پلټنو وروسته به له رسنیو سره ددې پېښې د څرنګوالي او لاملونو په اړه معلومات شریک شي.
اریايي تېره اونۍ په یوه خبري کنفرانس کې وویل چې یو شمېر نوماندانو د ټاکنیزو کمپاینونو په مهال یو لړ سرغړونې کړې او ښايي نومونه یې له وروستي لېسته و ایستل شي.
