په کونړ کې د داعش او طالب وسله والو ډلو تر منځ د نښتو له امله سلګونه کورنۍ بېځايه شوې دي.
د دغه ولايت په وټه پور ولسوالۍ کې له تېرو څو ورځو راهيسې وسله وال طالبان او داعش ډلې په خپلو کې نښتې دي چې له امله يې دواړو لورو ته مرګ ژوبله هم اوښتې ده.
له يادې سیمې راکډه شوې کورنۍ وايي چې له جګړې مخکې داعش ډلې خبردارى ورکړى و چې خپل کورونه پرېږدي او خوندي سیمو ته کډه شي.
پنځه پنځوس کلن بزرګ چې د يادې ولسوالۍ د څپرې له سيمې خوندي سيمې ته کډه شوى، پژواک ته ويلي چې د خپلې کورنۍ له غړو سره کډه شوى او د کور ټول سامان يې هلته پرېیښى دى.
هغه زياته کړې: «نور هېڅ د اړتیا وړ توکي مي له ځان سره نه دي راوړي، ډک کورونه مو پرېښودل، په سيمه کې مو لکه د باران ګولۍ ورېدې، یوازې سرونه مو خوندي را و ایستل».
د ګل جانې په نوم د پاخه عمر مېرمنې چې له سترګو يې اوښکې تويېدې پژواک ته ويلي چې ډک کورونه یې پرېيښي دي او د دوستانو په کور کې مېشت شوي دي.
د نوموړې په وينا، دلته یې هم د ژوند کولو هېڅ چاره نشته، له پوښاکه نيولې تر څښاک او خوراکه، هېڅ مدرک نه لري.
دې مېرمنې له حکومته د مرستې غوښتنه کړې ده.
د عادل په نوم يو ځوان چې د داعش او طالبانو تر منځ په جګړه کې ټپي شوی وايي: «زموږ د څپرې په سیمه کې له تېرې اونۍ راهيسې د داعش او طالبانو ترمنځ جګړه پیل شوې چې له امله يې د سيمې خلکو ته د سر او مال زیانونه هم اوښتي دي، کورونه او کروندې مو پاتې شوې، يواځې ځانونه مو خوندي سيمو ته رسولي دي».
د کونړ د والي وياند عبدالغني مصمم وايي چې په ياده جګړه کې دواړو لورو ته درنه مرګ ژوبله اوښتې ده.
هغه پژواک ته ويلي چې ولايت مقام يو بېړنى کمېسيون ټاکلى څو په سيمه کې د راکډه شويو کورنيو شمېر معلوم کړي او لومړنۍ مرستې ورسره وشي.
