د ملي يووالي حکومت اجرائیه ريیس وايي، د سولې د خبرو اترو لپاره ښه فرصت برابر شوی او وسله وال مخالفین باید له رامنځته شوي فرصته ښه ګټه واخلي.
عبدالله عبدالله پرون د وزیرانو شورا له غونډې وړاندې رسنیو ته وویل: «د دې تر څنګ چې موږ د سولې لپاره د امریکا له تمرکز او اساسي هڅو ملاتړ کوو، باوري یو چې دا پروسه به د افغانانو او نړیوالې ټولنې په ملاتړ جدي او په متمرکزه توګه مخ ته ځي او موږ هیله من یو چې د سولې د خبرو اترو لپاره له برابر شوي ښه فرصته مقابل لوری هم ښه ګټه واخلي.»
دا په داسې حال کې ده چې د افغانستان د سولې د بهیر لپاره د امریکا د بهرنیو چارو وزارت ځانګړي استازي زلمي خلیلزاد وړمه شپه ناوخته له افغان ولسمشر او اجرائیه ريیس سره د افغانانو په رهبرۍ او مالکیت په افغانستان کې د سولې د ټينګښت پر لارو چارو خبرې کړې دي.
کابل ته له سفره مخکي خلیلزاد د شنبې په ورځ په اسلام اباد کې له پاکستاني مقاماتو سره هم لیدلي، خو لا هم معلومه نه ده چې په دې لیدنه کې په کومو مسایلو خبرې اترې شوې دي.
ټاکل شوې چې د افغانستان د سولې لپاره د امریکا د بهرنیو چارو وزارت ځانګړی استازی سیمې ته د خپل لس ورځني سفر په ترڅ کې، عربي متحده اماراتو، سعودي عربستان او قطر ته هم سفر وکړي.
د افغانستان د سولې لپاره د امریکا د بهرنیو چارو وزارت د ځانګړي استازي په توګه له ټاکل کېدو وروسته، دا کابل ته د خلیلزاد لومړنی سفر دی.
ولسمشرۍ ماڼۍ د يوې خبرپاڼې په خپرولو سره ويلي، چې ولسمشر غني او خلیلزاد د روانې اونۍ د یکشنبې په ماښام وکتل او د سولې د پروسې د بریالیتوب او په هېواد کې د سراسري امنیت د ټينګښت په موخه يې د افغان دولت د هڅو په اړه خبرې وکړې.
یو شمېر افغان کارپوهان وايي، د امریکا په بهرنیو چارو وزارت کې د افغانستان لپاره د ځانګړي سلاکار په توګه د زلمي خلیلزاد هڅې به د افغانستان پر وضعیت مثبت اغېز ولري.
د پوهنتون استاد ودیر صافي ازادي راډيو ته ویلي، تمه لري چې زلمی خلیلزاد به د سيمې استخبارات پر دې قانع کړي چې په افغانستان کې سوله د ټولو په ګټه ده او بويه چې ټول يې په ټينګښت کې هڅه وکړي.
