د ملګرو ملتونو د بشري مرستو د همغږۍ ادارې يا (اوچا) وايي چې د ۲۰۱۸ کال له پیله د اکټوبر تر لومړۍ اونۍ پورې (۲۴۹۲۳۳) تنه د جګړو او ناامنيو له کبله له خپلو اصلې مېنو بېځايه شوي دي.
دې ادارې په خپل تازه رپوټ کې، چې پرون خپور شوی ویلي، جګړې او ناامنۍ یوازې د اکټوبر میاشتې په لومړۍ اونۍ کې ۲۸۴۰۰ افغانان بېځایه کړي دي.
د رپوټ له مخې، د دغه شمېر بېځایه شويو افغانانو لویه برخه د پروان، کاپیسا، تخار، پکتیکا، غزني، کونړ او بادغیس ولایتونو اوسېدونکي دي.
په رپوټ کې راغلي، ۱۱۴زره افغانانو ته چې د جګړو او وچکالۍ له امله زیانمن شوي، په تېره اونۍ کې بشري مرستې رسول شوې، خو پاتې ۵۵ سلنه یې لا هم لومړنیو بشري مرستو ته اړتیا لري.
اوچا په داسې حال کې د جګړو له امله په کور دننه د بېځایه شویو افغانانو په اړه رپوټ خپور کړی چې د ولسي جرګې د ټاکنو د امنیت ټینګولو لپاره، افغان امنیتي او دفاعي ارګانونو په دې وروستیو کې د دولت د وسله والو مخالفینو پر ضد خپل یرغلیز عملیات ۳۶ سلنه زیات کړي دي.
پر جګړو او نا امنیو سربېره، سږکال وچکالۍ هم زیات شمېر افغانان له خپلو اصلي سیمو څخه بېځای کړي دي.
د ملګرو ملتونو شمېرې ښيي چې په اوس وخت کې څه باندې ۲۱۶زره افغانان په لویدیځو او جنوبي ولایتونو کې د وچکالۍ له امله بېځایه شوي دي.
اوچا ویلي، وچکالۍ ځپلو افغانانو ته د مرستې رسولو په پروګرام کې د ۱۵ ولایتونو شاوخوا ۱.۲ میلیونو بېځایه شویو ته مرستې رسول شوې دي.
