د کوچیانو چارو د سمون خپلواک ریاست وايي چې ښايي د ولسي جرګې په ټاکنو کې نيمايي راجسټر شوي کوچیان د رایې ورکولو له حقه محروم شي.
د کوچیانو چارو د سمون د خپلواک ریاست چارواکي وايي چې که د ټاکنو د اوسني طرزالعمل مطابق رایې وکارول شي، د دې وېره شته چې ښايي سټېکر لرونکي زرګونه کوچیان د رایې له حقه محروم شي.
د دغه ریاست ویاند عبدالله واحدیار رسنيو ته ويلي، کوچیان دا مهال له سړو سیمو څخه ګرمو سیمو ته کډه کوي او په ګرمو سیمو کې د رایو په مرکزونو کې د رایو د ورکړې په نوملړ کې د دوی نومونه نه شته.
واحديار زياته کړې: «له شوي ثبت نام سره سره ۵۰ سلنه کوچیان نه شي کولای چې خپله رایه وکاروي او د خپلې خوښې کاندید ته رایه ورکړي، ځکه دوی اکثرو په سړو سیمو کې ثبت نام کړی، اوس چې هوا سړه شوې نو دوی ګرمو سیمو ته ځي، هلته یې د رايې ورکونې په نوملړونو کې نومونه نه شته، ممکن ډېری کوچیان د رايې له ورکړې محروم شي».
واحدیار زیاته کړې چې دا مهال په افغانستان کې شاوخوا پنځه میلیونه کوچیان ژوند کوي چې نږدې نیم میلیون یې نوملیکنه کړې او پاتې یې د بېلابېلو عواملو له امله له نوملیکنې پاتې شوي.
په ولسي جرګه کې د کوچیانو لپاره ۱۰ څوکۍ ځانګړې شوې چې دا مهال ورته ۴۴ نارینه او ښځینه کاندیدان پر ټاکنيزو سیالیو بوخت دي.
د ټاکنو خپلواک کمېسیون وايي، له طرزالعمل سره سم هر هغه چا چې چېرته نوملیکنه کړې وي، په هغه مرکز کې یې د رايې ورکونې په نوملړ کې نوم راځي او د نوملړ مطابق رایه ورکوي، له هغې پرته د رایې له حقه محرومېږي.
د دغه کمېسیون مرستیال ویاند ذبیح سادات ازادي راډیو ته ویلي، په دې اړه د کوچیانو مشران او استازي له دوی سره له پخوا هوکړې ته رسېدلي چې کوچیان به په ټاکلي مرکز کې رایه اچوي.
سادات زياتوي: «له پخوا د دوی د مشرانو نظریات اخیستل شوي او په دې اړه دوی له موږ سره سلا شوي وو، په هغه مرکز کې چې یې نوملیکنه کړې، په هغه مرکز کې به یې نومونه ځړول کېږي او خپله رایه به کاروي».
که څه هم ټاکنو ته کم وخت پاتې دی، خو د کوچیانو چارو د سمون خپلواک ریاست د ټاکنو له خپلواک کمېسیونه غواړي چې د دې ستونزې د حل لپاره نوی طرزالعمل رامنځته کړي.
په ورته وخت کې د افغانستان د ازادو او عادلانه ټاکنو بنسټ یا فیفا په دې اړه اندېښنه څرګندوي او وايي چې دا ستونزه یې د ټاکنو له خپلواک کمېسیون سره شریکه کړې ده.
د دغه بنسټ اجرایوي ريیس یوسف رشید وايي چې د ټاکنو خپلواک کمېسیون باید ژر تر ژره په دې برخه کې سروې وکړي او د رايه ورکوونکو هغه لېستونه چې په سړو سیمو کې دي، د امکان په صورت کې دې ګرمو سیمو ته انتقال کړي.
