سلګونه فنلنډیانو له خپل حکومت غوښتي چې افغان کډوال دې نه شړي

نږدې ۱۸۰۰ فنلنډيانو د خپل هېواد د کورنیو چارو وزارت مخې ته لاریون کړی دی او په یوه اوږده لیک کې یې د لاسلیکونو په کولو سره له حکومت د کډوالو په برخه کې د نرمښت غوښتنه کړې ده. دوی په دغه لیک کې له حکومت غوښتي چې د افغان کډوالو شړل ودروي ځکه په دغه هېواد کې ناامني او جګړې لا هم په اوج کې دي. د لاریون کوونکو په وینا حکومت دې له نرمښت کار واخلي او تر هغه پورې دې د کډوالو لېږل بس کړي چې په افغانستان کې امنیت تامین شوی نه وي. لاریون کوونکي همدا راز وايي چې په افغانستان کې د بشري حقونو وضعیت خورا ترینګلی دی او د ډېری افغانانو ژوند له خطر سره مخ دی نو ځکه دې په فنلنډ کې مېشت کډوال تر یوې مودې نه ایستل کېږي. فنلنډ تېر کال ۵۵۶ افغان کډوال را ایستلي وو. په دغه هېواد کې اوس هم سلګونه افغان کډوال شته دي.