یوناما: د کال له پیله تر اوسه ۸۰۵۰ ملکي وګړو ته مرګ ژوبله اوښتې

یوناما وایي، د سږ کال له پیله تر اوسه په افغانستان کې شاوخوا ۸۰۵۰ ملکي وګړو ته مرګ ژوبله اوښتې ده. یادې ادارې نن په خپاره کړي راپور کې ویلي، چې د افغانستان په روانه جګړه د ملکي وګړو دوامداره وژنې اندېښمن کړي دي. راپور زیاتوي چې د سږ کال له پیله تر اوسه په افغانستان کې ۲۷۸۹ ملکیان وژل شوي او ۵۲۵۲ تنه نور ټپیان دي. د راپور د معلوماتو له مخې یادې مرګ ژوبلې ته په کتو د تېر کال د همدې مودې په پرتله سږ کال د ملکي وګړو مرګ ژوبله ډېره ده او دوی له ښکېلو غاړو غواړي چې د ملکیانو د ژوند خوندیتابه ته دې جدي پاملرنه وکړي. په کابل کې د ملګرو ملتونو د دفتر مشر د راپور د خپرولو پر مهال وویل، چې افغان جګړه نظامي حل نه لري نو غوره به وي، چې د افغانستان د قضیې د حل په برخه کې له سوله ییزو لارو هڅې لا ګړندۍ شي. راپور کې راغلي چې یادو ملکیانو ته ډېری مرګ ژوبله د حکومت ضد وسله والو لخوا اوښتې ده. که څه هم وسله والو طالبانو تر اوسه په دې اړه څه نه دي ویلي، خو وړاندې تر دې یې د ملګرو ملتونو ورته ادعاوې بې بنسټه او یو اړخېز قضاوت بللی دی.