تر سلو ډېر امریکايي عسکر روانه میاشت افغانستان ته رالېږل کېږي

د امریکايي رسنیو د راپورونو له مخې په کېتناکي ایالت کې د امریکایي ځواکونو یوسل پنځوس کسیز ټیم تیار دی چې افغانستان ته لاړ شي او د ناټو په غوڅ ملاتړ ماموریت کې ونډه واخلي. دغه سرتېري تر ډېره د انجینرۍ په برخه کې فعالیت کوي خو تر څنګ به یې په نظامي عملیاتو کې هم ګډون کوي. د یادو ځواکونو قومندان ویلي دوی پوهېږي چې په افغانستان کې به یې ماموریت خورا خطرناک وي، خو دوی له هر ډول خنډونو سره د مبارزې لپاره تیار دي او کافي روزنه یې لیدلې ده. د امریکا ددفاع وزارت ویلي چې دغه کسان افغانستان ته د لېږلو لپاره تیار دي. د ټرمپ په حکومت کې امریکا پرېکړه وکړه چې په افغانستان کې خپل سرتېري ډېر کړي، له همدې امله یې له ناټو هم وغوښتل چې له غړو هېوادونو د سرتېرو د ډېرولو ژمنه واخلي. په همدې لړ کې ګڼو هېوادونو په افغانستان کې د خپلو سرتېرو په ډېرولو لاس پورې کړی دی.