زلمي خلیلزاد په قطر کې له طالب چارواکو سره کتلي دي

امریکایي ورځپاڼه وال سټرېټ ژورنال وایي، چې د افغان سولې لپاره د امریکا ځانګړي استازي زلمي خلیلزاد د تېرې جمعې په ورځ په قطر کې له طالب چارواکو سره کتلي دي. وال سټرېټ ژورنال د خپلو سرچینو له قوله لیکلي، چې دا ځل امریکا په ډېر جدیت سره غواړي په افغانستان کې خپل ۱۷ کلن ماموریت په سوله ییزه توګه د خبرو له لارې پای ته ورسوي. سرچینه کاږي، که څه هم دا به اوس څوک تایید نه کړي، چې د امریکا سفیر زلمي خليلزاد دې دوحه کې له طالب چارواکو سره خبرې اترې کړې وي. مګر دا په څلورو میاشتو کې دوهم ځل دی، چې د متحده ایاالتو چارواکي له طالب استازو سره مخامخ خبرې کوي. په کابل کې افغان چارواکو د جمعې ورځې د خبرو اترو په اړه کومه تبصره نه ده کړې. د سرچینې په وینا په واشنګټن کې، د بهرنیو چارو وزارت به هم دا تایید نه کړي، چې خلیلزاد دې د طالبانو له استازو سره لیدلي وي. د سرچینې په وینا خلیلزاد به له دې سفر وروسته بیرته افغانستان ته لاړ شي، څو د طالب استازو خبرې له افغان حکومت سره سریکې کړي. دا په داسې حال کې ده چې نوموړي د خپل سفر په پیل کې پر افغان حکومت او طالبانو غږ کړی و، چې د سولې خبرو اترو لپاره دې با صلاحیته پلاوی وټاکي.